“უკან წაიღოს ბოლო განცხადებები” – ნიკოლოზ მეტრეველს ღარიბაშვილის წერილები “სწყინს”

ტვ იმედის ანალიტიკური მიმართულების ყოფილი ხელმძღვანელი, ნიკოლოზ მეტრეველი, ქართული ოცნების ყოფილი პრემიერის, ირაკლი ღარიბაშვილის ციხიდან გამოგზავნილ წერილებს ეხმაურება და ამბობს, რომ “ეწყინა” და ურჩევს, უკან წაიღოს ბოლო განცხადებები და “შეცდომა რაღაც ფორმით აღიაროს. ცნობისთვის, ირაკლი ღარიბაშვილს ქართული ოცნება შეცდომას არა, დანაშაულებებს ედავება,

ზოგადად პატივს ვცემ ირაკლი ღარიბაშვილს და მის ოჯახს. მაგრამ პატივისცემა არ ნიშნავს იმას, რომ მის ყველა განცხადებას უნდა დავეთანხმოთ. „ქართული ოცნების“ ამომრჩეველი ვერ მიიღებს მცდელობას, რომ უკვე არსებული ფაქტებისა და სამართლებრივი პროცესის ფონზე ყველაფერი მხოლოდ პოლიტიკურ დევნად ან სხვის პასუხისმგებლობად წარმოჩნდეს. ამომრჩეველს გაცილებით მეტი პოლიტიკური სიმწიფე და პასუხისმგებლობა აქვს, ვიდრე ამას შესაძლოა ზოგიერთი პოლიტიკოსი ფიქრობდეს. თუ ვინმეს აქვს კონკრეტული პრეტენზია ან ბრალდება, უნდა წარმოადგინოს შესაბამისი მტკიცებულება. უსაბუთო პოლიტიკური შეტევები კი მხოლოდ აზიანებს პროცესს. ვფიქრობ, მისი უკანასკნელი ნაბიჯები ძალიან საწყენია იმ მილიონზე მეტი ადამიანისთვის, ვინც წლების განმავლობაში „ქართულ ოცნებას“ უჭერს მხარს.