“დღეს 18 წელი შესრულდა სამხრეთ კავკასიაში მომხდარი ტრაგიკული მოვლენებიდან. 2008 წლის 7-8 აგვისტოს ღამით, მიხეილ სააკაშვილის რეჟიმმა, ქართულ-ოსური კონფლიქტის მშვიდობიანი მოგვარების შესახებ ყველა საერთაშორისო შეთანხმების დარღვევით, სამხრეთ ოსეთის წინააღმდეგ ვერაგული აგრესია განახორციელა, რასაც მშვიდობიან მოსახლეობასა და რუს სამშვიდობოებს შორის მრავალი მსხვერპლი მოჰყვა. საქართველოს თავდასხმის არაპროვოცირებული ხასიათი მოგვიანებით ოფიციალურად დადასტურდა, მათ შორის, საქართველოში კონფლიქტის ფაქტების დამდგენი საერთაშორისო დამოუკიდებელი მისიის ანგარიშში, რომელიც ევროკავშირის ეგიდით შეიქმნა და რომელსაც შვეიცარიელი დიპლომატი ჰაიდი ტალიავინი ხელმძღვანელობდა.
მსოფლიო თანამეგობრობის უმოქმედობის ფონზე, რუსეთი იძულებული გახდა, აგრესორისთვის წინააღმდეგობა გაეწია და საქართველოს მშვიდობის იძულების ოპერაცია ჩაეტარებინა. თბილისის მიერ „დაკარგული“ ტერიტორიების ძალისმიერი გზით დაბრუნების ნებისმიერი მცდელობის თავიდან აცილების მიზნით, ჩვენი ქვეყნის ხელმძღვანელობამ მიიღო გადაწყვეტილება, აფხაზეთი და სამხრეთ ოსეთი დამოუკიდებელ სახელმწიფოებად ეღიარებინა. ამის შემდეგ მოსკოვი მუდმივად უწევდა მასშტაბურ დახმარებას ორ რესპუბლიკას სუვერენიტეტისა და უსაფრთხოების განმტკიცების, ასევე სოციალურ-ეკონომიკური აღმავლობისთვის ხელსაყრელი პირობების უზრუნველყოფის საქმეში. ორმხრივი ურთიერთობების განვითარების მნიშვნელოვან ეტაპს წარმოადგენდა მიმდინარე წლის 9 მაისს რუსეთის ფედერაციასა და სამხრეთ ოსეთის რესპუბლიკას შორის მოკავშირეობითი ურთიერთქმედების გაღრმავების შესახებ ხელშეკრულების ხელმოწერა.
2008 წლის ოქტომბერში, საქართველოს აფხაზეთთან და სამხრეთ ოსეთთან ურთიერთობების პოსტკონფლიქტური მოწესრიგების მიზნით, დაიწყო საერთაშორისო დისკუსიები ამიერკავკასიაში უსაფრთხოებისა და სტაბილურობის შესახებ (ჟენევის საერთაშორისო დისკუსიები), რომელთა და მათი ეგიდით შექმნილი ურთიერთქმედების მექანიზმების წყალობით, მთელი ამ წლების განმავლობაში შესაძლებელი გახდა სამი სახელმწიფოს საზღვრებთან შედარებითი სიმშვიდის შენარჩუნება. მოლაპარაკებების ამ ფორმატში მუშაობის გაგრძელებისადმი უცვლელი ერთგულების დადასტურებით, რუსული მხარე ყველა მონაწილეს მოუწოდებს, განსაკუთრებული ყურადღება დაუთმონ საერთაშორისო დისკუსიების პრიორიტეტული ამოცანის – აფხაზეთისა და სამხრეთ ოსეთის მყარი უსაფრთხოების უზრუნველყოფას და ამასთან დაკავშირებით ელოდება ძალის არგამოყენების შესახებ შეთანხმების შემუშავებისა და ხელმოწერის მიმართულებით პრაქტიკული ძალისხმევის სწრაფ დაწყებას თბილისს, ერთი მხრივ, და სოხუმსა და ცხინვალს, მეორე მხრივ. ასეთი სამართლებრივი ვალდებულებების მიღება 2008 წლის აგვისტოს ტრაგიკული მოვლენების განმეორებისგან საიმედო გარანტია იქნება. სასაზღვრო რაიონებში სიტუაციის სტაბილიზაციაში რეალურ წვლილს უნდა წარმოადგენდეს საქართველო-სამხრეთ ოსეთისა და საქართველო-აფხაზეთის სახელმწიფო საზღვრების დელიმიტაციის პროცესის დაწყება, რასაც შემდგომში მათი დემარკაცია უნდა მოჰყვეს.
ეს ამოცანები განსაკუთრებულ მნიშვნელობას იძენს იმ ფონზე, როდესაც დასავლელები, კიევის ნაცისტური რეჟიმი და ქართველი რადიკალი პოლიტიკური ძალები ცდილობენ, თბილისი სამხრეთ კავკასიაში ახალ სისხლიან ავანტიურებში ჩაითრიონ.
მოსკოვში აღნიშნავენ, რომ ქართულ საზოგადოებაში გრძელდება 2008 წლის აგვისტოს მოვლენების გადააზრების მცდელობები. ამასთან, დასაბუთებულად მიიჩნევა მიხეილ სააკაშვილის რეჟიმისთვის შეიარაღებული კონფლიქტის გაჩაღებაზე სრული პასუხისმგებლობის დაკისრება. ფიქსირდება საქართველოს ხელისუფლების განცხადებები აფხაზებთან და სამხრეთ ოსებთან შერიგების აუცილებლობის შესახებ, რაც იმედს იძლევა, რომ მიდგომების აღნიშნული ტრანსფორმაცია მხოლოდ დეკლარაციების დონეზე არ დარჩება და კონკრეტული პრაქტიკული ნაბიჯებით იქნება გამყარებული აფხაზეთთან და სამხრეთ ოსეთთან ურთიერთობების მოწესრიგების მიმართულებით.
რუსული მხარე მზად არის, მომავალშიც ყოვლისმომცველი დახმარება გაუწიოს მხარეებს მოლაპარაკებების პროცესის წინსვლაში, ნდობის განმტკიცებასა და სახელმწიფოთაშორისი ურთიერთობების ჩამოყალიბებაში, სამხრეთ კავკასიაში სტაბილურობისა და უსაფრთხოების ინტერესებიდან გამომდინარე,” – წერს რუსეთის საგარეო საქმეთა სამინისტრო გავრცელებულ განცხადებაში.
კომენტარები