„ერთიანი ნაციონალური მოძრაობის“ ლიდერი გიორგი ბარამიძე აცხადებს, რომ მზად არის, აფხაზეთის ომთან დაკავშირებული განცხადება სასამართლოში, მაგისტრატ მოსამართლესთან განმარტოს, თუმცა არა პროკურატურაში.
პროკურატურამ ბარამიძის წინააღმდეგ „სამშობლოს ღალატისა“ და „საბოტაჟის“ მუხლებით გამოძიება მას შემდეგ დაიწყო, რაც გადაცემაში „საქართველოს დაბადება“ აფხაზეთის ომის დროს ტყვეების შესახებ ისაუბრა.
ბარამიძე თავდაპირველად იხსენებდა, როგორ ცდილობდა გაგრის დაცემის შემდეგ ქართველი ტყვეების გათავისუფლებას და როგორ შევიდა „წითელი ჯვრის“ დახმარებით გუდაუთაში მდებარე ტყვეთა ბანაკში:
„შევედი, ვთქვი: „გამარჯობა, გიორგი ბარამიძე ვარ, პარლამენტის წევრი და აი, გიპოვეთ და ყველაფერს გავაკეთებთ, რომ გამოგიყვანოთ და ყველანი გამოვიყვანეთ…“
ვიდეოს სოციალურ ქსელებში გავრცელებულ ამოჭრილ ფრაგმენტში კი, რომელიც ამ საუბრის გაგრძელებაა, ბარამიძე ამბობს:
„მაგრამ აღარ გვაძლევდნენ ტყვეებს და ჩვენ ტყვეები არ გვყავდა. ჩვენებს ტყვეები არ აჰყავდათ“.
წამყვანის კითხვაზე, რატომ, ბარამიძე პასუხობს: „ხვრეტდნენ [ჩვენები]“.
ბარამიძე ახლა ამბობს, რომ მისი განცხადების „თავისებური ინტერპრეტაცია“ მოხდა:
„რეჟიმმა და პროპაგანდამ ისე მონათლეს ჩემი განცხადება, თითქოს ჩვენ აგვყავდა ტყვეები და მერე ვხვრეტდით. ეს აბსოლუტურად არ მითქვამს და არ შეესაბამება სინამდვილეს“.
მისივე თქმით, „საუბარი არ ყოფილა რეგულარულ ქართულ ჯარზე ან, მით უმეტეს, სახელმწიფო პოლიტიკაზე“.
„მაგალითად, ოჩამჩირის ფრონტზე, სადაც მე ვიყავი, ჩვეულებრივი მოხალისეები იყვნენ. ასევე იყო არაფორმალური გაერთიანება „მხედრიონი“. პირველ დღეებში ქაოსი იყო – ეს არის სიმართლე“, – აცხადებს ბარამიძე.
მისი თქმით, მოგვიანებით ტყვეების გაცვლაში თავადაც მონაწილეობდა:
„მე და ჩემს მოადგილეს, პაატა ზაქარეიშვილს, 200 ტყვე გვყავს გათავისუფლებული. როგორ გავათავისუფლებდით იმ 200 ტყვეს, თუ ჩვენი მხარის მიერ დაკავებულ ტყვეებში არ გავცვლიდით?! რა თქმა უნდა, ჩვენც გვყავდა ტყვეები შემდგომ პერიოდში“.
ბარამიძე აცხადებს, რომ მზად არის განცხადებაზე განმარტება მისცეს, თუმცა პროკურატურაში არა სასამართლოში, მაგისტრატ მოსამართლესთან. (ფორმულა)
კომენტარები