თბილისის მერის, კახა კალაძის განცხადებით, რუსთაველის გამზირის სრული რეაბილიტაცია 23 ივლისს, ღამის 00:00 საათზე დაიწყება. პროექტი მოიცავს თამარ ჭოველიძის ქუჩიდან თავისუფლების მოედნამდე არსებულ დაახლოებით 2-კილომეტრიან მონაკვეთს.
დედაქალაქის მერის თქმით, სამუშაოების დაწყებისთანავე რუსთაველის გამზირსა და მერაბ კოსტავას ქუჩის ნაწილზე ყველა ტიპის ავტოტრანსპორტის მოძრაობა სრულად შეიზღუდება, ხოლო რეაბილიტაციის დასრულება ნოემბრის ბოლოსთვის იგეგმება.
„რუსთაველის გამზირი არის ჩვენი დედაქალაქის სავიზიტო ბარათი როგორც ვიზუალური, ისე ისტორიული თვალსაზრისით, რომელსაც უნახავს არაერთი სიხარული, გამარჯვება, ტკივილი თუ მწუხარება და აუცილებლად უნდა იყოს მოწესრიგებული და თანამედროვე, რათა ჩვენს ქვეყანაში ჩამოსულ სტუმრებსა და ადგილობრივ მოსახლეობას ჰქონდეთ სიამაყის განცდა,“ – განაცხადა კალაძემ.
მისივე განმარტებით, პირველ ეტაპზე განახლდება მიწისქვეშა საინჟინრო კომუნიკაციები – წყალმომარაგების, წყალარინების, სანიაღვრე და გაზმომარაგების სისტემები, ასევე საჰაერო სადენები მიწისქვეშა საკაბელო არხებში განთავსდება და დამონტაჟდება მიწისქვეშა ნარჩენშემკრები ურნები.
პროექტის ფარგლებში მოეწყობა თანამედროვე საგზაო ინფრასტრუქტურა, განახლდება გზის საფარი და ტროტუარები, სრულად შეიცვლება გარე განათების ქსელი, დაიდგმება LED-განათების ბოძები, განახლდება მწვანე სივრცეები და დაირგვება ახალი ხე-მცენარეები.
„განსაკუთრებული ყურადღება დაეთმობა ფეხით მოსიარულეთა უსაფრთხოებასა და კომფორტს. მოეწყობა მიწის ზედა ქვეითთა გადასასვლელები, დამონტაჟდება საგზაო ნიშნები, დაიხაზება ჰორიზონტალური მონიშვნები და გამზირის ინფრასტრუქტურა სრულად ადაპტირებული იქნება შეზღუდული შესაძლებლობების მქონე პირებისთვის,“ – აღნიშნა დედაქალაქის მერმა.
კალაძის განცხადებით, სამუშაოებს თბილისის მერიის ინფრასტრუქტურის განვითარების საქალაქო სამსახური განახორციელებს და მათი დასრულება ნოემბრის ბოლოსთვის არის დაგეგმილი.
კომენტარები