“4 ოქტომბრის აქციის მონაწილეები არ იყვნენ არც მოღალატეები, არც დაბრმავებულები და არც ვინმეს მარიონეტები” – მაია ბაჩანაშვილი ნიკა გვარამიას

Nika Gvaramia საკუთარ სტატუსში ამტკიცებს, რომ 4 ოქტომბრის აქცია თავიდანვე შეცდომა და წარუმატებლობისთვის განწირული ავანტიურა იყო, ხოლო მისი ორგანიზატორები და მხარდამჭერები რეალობას იყვნენ მოწყვეტილნი.

ამავე დროს, ის პასუხისმგებლობას აკისრებს იმ ადამიანებს, რომლებმაც საზოგადოებას იმედი მისცეს და დღეს მათგან გეგმებსა და პასუხებს ითხოვს. მათ შორის არიან ის ადამიანებიც, რომლებიც დღეს რუსული რეჟიმის ტყვეობაში იმყოფებიან.

მაგრამ ამ სტატუსში ყველაზე თვალშისაცემი სხვა რამ არის გვარამია კვლავ სხვებში ეძებს დამნაშავეს და არა საკუთარ პოლიტიკურ წრეში, საკუთარ გადაწყვეტილებებსა და იმ ადამიანებში, რომლებმაც წლების განმავლობაში საერთო ოპოზიციური ბრძოლის ნაცვლად პარტიული ინტერესები და პირადი ამბიციები დააყენეს პირველ ადგილზე.

დღეს ის ადამიანები, რომლებიც 4 ოქტომბერს ქუჩაში იდგნენ ქვეყნის თავისუფლებისთვის, პოლიტპატიმრების გასათავისუფლებლად და რეჟიმის წინააღმდეგ საბრძოლველად, გვარამიას შეფასებით თურმე „დაბრმავებულები“ ან „ფსიქოზში მყოფები“ ყოფილან. სინამდვილეში კი ისინი იყვნენ მოქალაქეები, რომლებმაც იმ მომენტში გააკეთეს ის, რასაც საკუთარი სინდისი და ქვეყნის სიყვარული კარნახობდათ.

ყველაზე დიდი პრობლემა ის არის, რომ გვარამია კვლავ გაურბის საკუთარ პასუხისმგებლობას. არადა, რომ არა ოპოზიციაში არსებული ვიწრო პარტიული ინტერესები, მუდმივი ბრძოლა ლიდერობისთვის და პირველი ოპოზიციური ძალის სტატუსზე შეპყრობილი პოლიტიკოსები, დღეს ქვეყანა სრულიად სხვა მდგომარეობაში იქნებოდა.

განსაკუთრებით ცინიკურია, როდესაც ამ ყველაფერზე საუბრობს ადამიანი, რომელიც თავად არაერთხელ აღმოჩნდა პოლიტიკური დაპირისპირებისა და ოპოზიციური გახლეჩის ცენტრში.

4 ოქტომბრის აქციის მონაწილეები არ იყვნენ არც მოღალატეები, არც დაბრმავებულები და არც ვინმეს მარიონეტები. ისინი იყვნენ ადამიანები, რომლებმაც საკუთარი დრო, ენერგია და ხშირად პირადი უსაფრთხოებაც კი შესწირეს ქვეყნის უკეთეს მომავალს.