“ყველაზე პოპულარულ ქართველებში ჯალათები, სტალინი და ბერია შედიან” – ირაკლი მელაშვილი

ყოფილი პარლამენტარი, ირაკლი მელაშვილი:

ჩემთვის, უწესო ფარისეველია ყველა, ვინც “აღშფოთებული” საუბრობდა და საუბრობს წინა თუ იმისწინა ხელისუფლებების მიერ ადამიანის უფლებების დარღვევაზე და არაფრად აგდებს ახალგაზრდების წამების ფაქტებს, რაც მელაძის გადაცემაში გავიდა. ჩემთვის ეს იმაზე მეტყველებს, რომ ასეთების მაშინდელი აღშფოთებაც ფარისევლობა იყო!

მე კი მრავალი წელია ერთი რამ მადარდებს. ის რომ, ეს ახალგაზრდები, საოცარი სადისტური სიამოვნებით აწამებენ ადამიანებს. ეს პირველად ხომ არ ხდება? რაც მე ვარსებობ, ადამიანებს, განსაკუთრებით ახალგაზრდებს, ყოველთვის ცემდნენ ჯერ მილიციაში, მერე უკვე პოლიციაში. უბრალოდ ბოლო 20 წლისმანძილზე სადიზმის ხარისხი გაიზარდა. ვუყურებდი გადაცემაში გასულ კადრებს და ვხედავდი, თუ რა სიამოვნებას იღებდნენ ეს სრულიად ახალგაზრდა ხალხი სხვისთვის ტკივილის მიყენებით.

ორი აზრი არ არის, ხელისუფლების პასუხისმგებლობა რა თქმა უნდა უზარმაზარია, მაგრამ, ჩემი აზრით, კიდევ უფრო დიდი პრობლემა სხვა რამეშია. ხელისუფლებები იცვლებიან მაგრამ ძალოვანების სისასტიკე ყოველთვის პრობლემად რჩება. სულ ვფიქრობ, რა იურისტებს უშვებს ჩვენი განათლების სისტემა უკვე ათწლეულებია, როცა მოსამართლე უპრინციპობის, პროკურორი ჯალათობის, პოლიციელი კი ლამის სადისტის სინონიმად იქცა?

P.S. ისე, როცა საზოგადოებაში და განსაკუთრებით ძალოვან სტრუქტურებში ყველაზე პოპულარულ ქართველებში ჯალათები, სტალინი და ბერია შედიან, მათ სადღეგრძელოებზე და პატივისცემაზე გაზრდილი პოლიციელების სისასტიკე რატომ გვიკვირს? სანამ ვერ მივხვდებით რომ ასეთ შემთხვევებამდე მათ შორის ქართველი ბოლშევიკი ჯალათების კულტის დანერგვასაც მივყავართ , მანამდე არაფერი გვეშველება!