რა ხდება “ქართული ოცნების” კულუარებში?!. რუსეთი ამაზე უკეთესს ვერაფერს ინატრებს! – ირაკლი მელაშვილი

ყოფილი პარლამენტარი, ირაკლი მელაშვილი:

,,გულბაათ რცხილაძის დაკავება რუსეთის სასარგებლოდ “შპიონაჟზე”, უფლებადამცველების მხრიდან ისეთივე მონიტორინგს საჭიროებს, როგორსაც ყველა მსგავსი საქმე. გულბაათი ათწლეულების განმავლობაში ერთ – ერთი ყველაზე ცნობილი პრორუსი პოლიტიკური ექსპერტი და აქტივისტი იყო. ეს არც გამორიცხავს და არც ადასტურებს მის ჯაშუშობას. ბრალდება ძალიან მძიმეა და მას ასპროცენტიანი დადასტურება ჭირდება.

მე იმედი მაქვს, რომ ამ დაჭერების მიზეზი ის არაა, რომ ხელისუფლებას რაღაცაში დაჭირდა პრორუსულობის იმიჯის მოცილება და რცხილაძე ამ შემთხვევაში უბრალოდ ზვარაკივით შეწირეს. არც იმას გამოვრიცხავ, რომ ამ ნაბიჯს ხელისუფლებამ იგივე ბრალდებით უკვე პროდასავლური სამოქალაქო სექტორის ლიდერების რეპრესიები მოაყოლოს და რცხილაძის დაჭერა არგუმენტად გამოიყენონ, თითქოს ისინი ადამიანებს პროდასავლური პოლიტიკური ორიენტაციის გამო კი არა, კონკრეტული დანაშაულისთვის აკავებენ.

ფაქტია, რომ პრორუსობაში დადანაშაულებული ხელისუფლბა არასრული ორი თვის მანძილზე მესამე ადამიანს იჭერს რუსეთის ჯაშუშობის ბრალდებით, რაც ჩვეულებრივ მოვლენად ვერ ჩაითვლება. რა ხდება “ქართული ოცნების” კულუარებში, ჯერჯერობით არ ჩანს. ერთი ფაქტია, რომ ნებისმიერ ფასად ძალაუფლების შენარჩუნების მოსურნე ხელისუფლება ქვეყნისთვის ძალიან სახიფათო თამაშს თამაშობს. ჩვენ, ჩვენივე ნებით დავკარგეთ ყველა პოლიტიკური მოკავშირე და ასეთ პირობებში აბსოლუტურად ბრუტალურ პუტინის ხელისუფლებასთან სერიოზულ დაპირისპირებაში აღმოჩენა ვერც ჭკვიანური და ვერც სასიამოვნო ფაქტი ვერ იქნება ! რუსეთი ამაზე უკეთესს ვერაფერს ინატრებს!”