“ქოცების მხარდამჭერებთან მაქვს რამდენიმე კითხვა – იცით ეგ ბიჭი და მისი მეგობარი რატომ აწამეს?” – ლევან ყურაშვილი

გუშინდელი კადრები თუ ნახეთ?

ვიცი, ყველანაირად აარიდებდით თავს, მაგრამ სადღაც მაინც ამოგიხტებოდათ.

მოგიწევდათ ადამიანის განწირული ყვირილის მოსმენა და იმაშიც დარწმუნებული ვარ, მინიმუმ არ გესიამოვნებოდათ.

ჩემი ახსნა რად გინდათ, არ იცით როგორ დადიან დაბურულ შუშიანი მანქანები ქალაქში? მოგწონთ ეგ?

ან მაღაზიის რიგში რომ მისცეთ შენიშვნა ვინმეს და იგივე ბედი გეწიოთ, მაგისგან დაზღვეული ხართ?

არ ხართ, თქვენც ხომ იცით.

ჰოდა, ამ ქვეყანაში ისეთი სიტუაციაა, საერთოდ მნიშვნელობა არ აქვს, ვისი მხარდამჭერი ხარ.

უსამართლობა და თავგასული ჩინოვნიკი აუცილებლად მოვა შენამდე, ან შენი ოჯახის წევრამდე ან მეგობრამდე.

გარდაუვალი ამბავია ეგ.

და ეგ უსამართლობა რომ მოვა, საერთოდ არაა ფაქტი, რომ იქვე სადმე კამერა აღმოჩნდება.

პირიქით, დიდი ალბათობით, ვერც ვერავინ გაიგებს.

და იქნებით ნაცემებიც, ზემოდან შეიძლება “სროკიც” დაგიმატონ და თუ გაგიმართლათ, საპროცესოს გაგიფორმებენ.

დამიჯერეთ, არანაირი მნიშვნელობა არ ექნება, ვისი მხარდამჭერი ხართ. გავეშებული სადისტისგან “ორმოზდაერთის” ძახილი ვერ გადაგარჩენთ, თუ მაინცდამაინც რომელიმე დეპუტატის ან მაძღარი მაღალჩინოსნის ოჯახის წევრი არ ხართ.