ხმაური პარლამენტში – ერთმანეთს გახარიას გუნდის წევრები და “ოცნების” დეპუტატები დაუპირისპირდნენ

ხმაური პარლამენტში – ერთმანეთს გახარიას გუნდის და “ოცნების” დეპუტატები დაუპირისპირდნენ.  ურთიერთბრალდებები სხდომაზე მას შედმეგ დაიწყო, რაც ექსპრემიერის პარტიამ ყოფილი თანაგუნდელები   ელიტურ კორუფციაში დაადანაშაულა. დაპირისპირების მიზეზი გახდა  წამალიც, რომელსაც დიუშენის სინდრომის მქონე ბავშვების მშობლები უკვე 24 დღეა უშედეგოდ ითხოვენ.

გიორგი შარაშიძემ „ოცნებას” უთხრა, რომ გიორგი გახარიას გადადგომის შემდეგ ხელისუფლებამ მილიონ 200 ათასი ლარის ღირებულების ავტომობილი შეიძინა, რომლითაც ირაკლი ღარიბაშვილი და ირაკლი კობახიძე გადაადგილდებოდნენ. შარაშიძემ ასევე აღნიშნა, რომ „ქართული ოცნების“ რიტორიკა საბჭოთა პროპაგანდისტულ გზავნილებს ჰგავს.

„პეტერ მადიარმა, რომელსაც უნგრეთის მოსახლეობის უდიდესმა ნაწილმა მხარი დაუჭირა, განაცხადა, რომ ის აღარ აპირებს მილიონიანი ავტომობილების გამოყენებას და შკოდისთ აპირებს გადაადგილებას და სხვათა შორის, სიმბოლური დამთხვევაა, სწორედ შკოდა იყო ის მანქანა, ის მარკა, რომლითაც გიორგი გახარია გადაადგილდებოდა. და სწორედ გიორგი გახარიას გადადგომის შემდეგ შეიძინა სახელმწიფომ მილიონიანი და კონკრეტულად მილიონ ორასი ათასი ლარის ღირებულების ავტომობილი, რომლითაც გადაადგილდებოდნენ თქვენი ყოფილი პრემიერი, რომელიც ციხეში  გყავთ, ბატონი ღარიბაშვილი და დღევანდელი არსებული პრემიერი, ბატონო კობახიძე.

“ოცნების” რიტორიკა, სამწუხაროდ, ერთი ერთში იმეორებს საბჭოთა კავშირის დროინდელ, ცივი ომის დროინდელ პროპაგანდისტულ გზავნილებს. ევროკავშირის ელჩს როგორც მოიხსენიებთ, გერმანიის ელჩს როგორც მოიხსენიებთ… უამრავი მაგალითი შემიძლია მოგიყვანოთ, ნებისმიერი განცხადება აიღეთ ირაკლი კობახიძის, ალვა პაპუაშვილის, მათ შორის თქვენი და ნახავთ…“ – თქვა სხდომაზე გიორგი შარაშიძემ.

პასუხად “ოცნების” დეპუტატმა არჩილ გორდულაძემ გიორგი გახარიას „აგენტის მდგომარეობაში მყოფი ბელადი“ უწოდა. „ოცნების“ დეპუტატმა ასევე მწვავედ გააკრიტიკა განცხადებები დიუშენის სინდრომის მქონე ბავშვებთან დაკავშირებით და ოპოზიცია „სულმდაბლობასა“ და „უსინდისობაში“ დაადანაშაულა.

გახარიას, თქვენს ბელადს, თვალის ჩაპაჭუნება და შკოდისთ სიარული აქვს მხოლოდ და მხოლოდ საამაყო, კიდევ კარგად ყოფილა ამ ყველაფერზე ხელმომწერი აგენტის მდგომარეობა. არ შეიძლება საკუთარი პოლიტიკური მიზნების დასაკაყოფილებლად ისეთი სულმდაბალი, უნამუსო, ყველანაირი ღირსებისგან დაცლილი განცხადებები აკეთო, როგორიც არის, მაგალითად, რომ დიუშენის დაავადების მქონე ბავშვებზე და მათ მშობლებზეგააკეთო განცხადება, თითქოს ჩვენ ოდესმე გვითქვამს, რომ მათი სიცოცხლის გახანგრძლივება ზედმეტ ხარჯებათან არის დაკავშირებული. რომ გამოდიხართ და ბრტყელ-ბრტყელ სისულელეებს საუბრობთ, უბრალოდ, ნამუსი უნდა გქონდეს ჯერ და შემდეგ უნდა გაბედო, გამოხვიდე ტრიბუნასთან და ილაპარაკო, მაგრამ ნამუსის ძაფ გაწყვეტილ ადამიანებს რა შეიძლება ველაპარაკო, – თქვა არჩილ გორდულაძემ. (ტვ პირველი)