“მაღალი ფასები, დაბალი ხელფასები, ხალხს შია“, – ეს იყო წარწერა, რომელიც ლევან ჯობავამ კეკელიძისა და ნაფარეულის ქუჩების კვეთაზე გააკეთა და რომლითაც, შსს-ს აზრითა და სასამართლოს გადაწყვეტილებით, მან ქალაქის იერსახე დაამახინჯა.
ლევან ჯობავა მოსამართლე თორნიკე ქოჩქიანმა 1000 ლარით დააჯარიმა.
ჯობავამ პროცესზე მოსამართლეს მიმართა და თქვა:
„არსებობენ ჯგუფები, რომლებიც იწვევენ ადამიანებს ნარკორეალიზატორებად და პირდაპირ არის ამის რეკლამები იმ ტერიტორიებზე, სადაც მე ვაკეთებ წარწერებს. ერთხელ მაგათ რომ ვშლიდი, პატრულის თანამშრომელი მომადგა, რას აკეთებო. ვშლი-მეთქი. კაი კაცი ხარო, მითხრა და წავიდა.როცა მე წარწერას ვაკეთებ, ის არასდროს არის უცენზურო, ეს არის აზრის გამოხატვა იმიტომ, რომ აზრის გამოხატვა არის შეზღუდული.რა წარწერებსაც მე ვაკეთებ, ამაში ყველა დამეთანხმება, თუნდაც არ აღიაროთ ხმამაღლა. დიახ, ამ ქვეყანაში გვაქვს დაბალი ხელფასები, მაღალი ფასები და ხალხს შია.
თუ გინდათ აქტივისტად ჩამწერეთ, მაგრამ მე მოქალაქე ვარ, რომელიც ცდილობს, იყოს კარგი მოქალაქე თავისი შვილებისთვის, მოსწავლეებისთვის.კანონდამრღვევად მე თავს არ ვთვლი და დიახ, წარწერა ჩემი გაკეთებულია. არა პირველად“,
ჯობავა იყო ერთ-ერთი პირველი იმ მოქალაქეებს შორის, ვინც პროტესტის ჩასახშობად მომართული რეპრესიული რეგულაციების საშუალებით, გზის გადაკეტვის საბაბით დააპატიმრეს და 14 დღით გაუშვეს იზოლატორში.
ასევე, ის ქალაქის იერსახის დამახინჯებაში პირველად არ დაუდანაშაულებიათ. ცოტა ხნის წინ, პროპაგანდისტული პოსტივის შენობაზე გაკეთებული წარწერის გამო – „დასანქცირებულია“ – ის მოსამართლე მაკარაძემაც დააჯარიმა.
წარწერები, რომლებსაც ის ქალაქში ტოვებს, ასეთია:
„მიეცით ბავშვებს წამალი“, „მილიონერი დეპუტატები, მშიერი ბავშვები“, „ნეტარ არიან სიმართლისთვის დევნილნი, ვინაიდან მათია ცათა სასუფეველი“, „მშიერი ხალხის მაძღარი მთავრობა“.
კომენტარები