“მოვედით, გამოდით! ნეტა, არ ესმით? – დაგაყრუათ ღმერთმა!” – აქცია ბათუმში

ბათუმში ამ წუთებში სხვადასხვა სოციალური პრობლემის მქონე მოქალაქეები ერთობლივ საპროტესტო აქციას მართავენ.

“ამ შენობაში ზის ქალაქ ბათუმის მერი, ბატონი გიორგი, ჩვენს მიერ არჩეული, მე მახსოვს, როცა უბნებში პირდებოდა ხალხს, რომ მისი მთავარი მამოძრავებელი ძალა იქნებოდა ხალხის მსახურება. დღეს, ამ დღით არ ვამთავრებთ, ეს არის პირველი, გამაფრთხილებელი აქცია, რათა დაგენახათ რეალური სურათი რეალურად, ნახეთ რამდენი ხალხია აქ და ეს მხოლოდ 20 პროცენტია იმათი, ვინც განცხადება შემოიტანა. 80 პროცენტი ჯერ სახლში ზის და ჯერ არ იცის, ამ აქციის შესახებ. ეს არ არის ხალხის მერი. გჯერათ, რომ არჩეული მერია? იმიტომ აირჩია ხალხმა, რომ დაპირდა, იქნებოდა, ხალხის მსახური. ხალხთან კომუნიკაციის პრობლემა აქვს ხელისუფლებას ზოგადად. თამაზაშვილიც ასე იყო. ეს არის მაგალითი, რომ ხელისუფლება ემალება ხალხს. ეშინიათ ხალხის. დაკეტეს სამივე კარი – რატომ დაკეტეს, თავდასხმას ვაპირებთ, თუ რა? ხომ შეიძლებოდა, გამოსულიყვნენ და ეთქვათ, შემოვიდეს 5 პირი. მერი დაემალა ხალხს, აი, ამათი სახე. იკითხავთ, თუ არის რესურსი? – რესურსი ძალიან დიდია, ყველა მშენებარე კორპუსში, 20 პროცენტი ხელისულებისაა!” – ამბობს აქციის ერთ–ერთი ორგანიზატორი. 

მათივე თქმით, ზოგი ისეთი პირი დააკმაყოფილეს ბინით, რომელიც არათუ უსახლკარო არაა, არამედ ოთხსართულიანი სახლი აქვს.

ხალხი სკანდირებს, – გამოდი, ხალხთან, თუმცა, არავინ ჩანს. ისინი უკვე იყვნენ აჭარის მთავრობის სახლთან, სადაც ასევე არავინ გამოვიდა მათთან სასაუბროდ.

“არ აქვთ არანაირი პასუხი და იმიტომ არ გამოდიან. არ მოვცილდებით, გამოვიყვანთ კაბინეტებიდან. აჭარაში, აჭარის ხალხი უსახლკაროდ ვართ დარჩენილები” – ამბობს აქციის მონაწილე.