რა ინტრიგებს ხლართავს რაჭაში საგანელიძე? – “ასეთს ბატონი ბიძინა არავის პატიობს”

წინა კვირას გაიჟღერა რაჭა-ლეჩხუმ-ქვემო სვანეთის სახელმწიფო რწმუნებულის არჩილ ჯაფარიძის სახელმაც, თითქოსდა, გოჩა ენუქიძის ნაცვლად, ის იქნება მაჟორიტარობის კანდიდატი.

ინფორმაცია თავშივე ტყუილი იყო. თუმცა, საინტერესოა, რატომ გაჟღერდა ეს ამბავი და ვინ დგას ამის უკან.

არჩილ ჯაფარიძე 2003-2004 წლებში მუშაობდა პრეზიდენტის რწმუნებულის აპარატში რაჭა-ლეჩხუმ-ქვემო სვანეთში რწმუნებულის მოადგილედ. 2008 წელს იყო შპს „ხვანჭკარა პრემიუმის“ დირექტორი; 2010 წლიდან ამბროლაურის მუნიციპალიტეტის საკრებულოს წევრი, 2014 წლამდე, ვიდრე გუბერნატორის მოადგილედ დაინიშნებოდა. 2017 წელს გუბერნატორის თანამდებობაზე  პაპუნა მარგველიძე შეცვალა.

როგორც ამბობდნენ, ის დიდ პოლიტიკაში გოჩა ენუქიძის წყალობითა და ავტორიტეტით მოხვდა, რომელიც მისი შვილის ნათლიაა. ენუქიძისვე წყალობით არ მოხვდა ის ცოტა ხნის წინ განთავისუფლებული გუბერნატორების გვერდით და თანამდებობა შეინარჩუნა. რა მოხდა ახლა, რატომ წავიდა, თავისი „მფარველის“ წინააღმდეგ და რამ და ვინ გაუჩინა მაჟორიტარობის ამბიცია?

როგორც წყაროები ამბობენ, ეს დიდ ბიზნეს-გარიგებებსა და მფარველობებს უკავშირდება, ამის უკან კი საპარტნიორო ფონდის ხელმძღვანელი, დავით საგანელიძე დგას, რომელსაც სულ მალე თანამდებობაზე ყოფნის “ვადა” ეწურება (როგორც ამბობენ, პირობა მისცეს, რომ 2020-ს არჩევნებამდე თანამდებობაზე დარჩებოდა) და კარგად იცის, რომ მალე ფონდის თავმჯდომარე აღარ იქნება, რადგან ივანიშვილს ბევრჯერ წინ გადაურბინა და როგორც ამბობდნენ, „ქართული ოცნების“ თავმჯდომარე მასზე ისე ყოფილა განრისხებული, მაშინვე უნდოდა მისი გაშვება. „რას აკეთებს? სად ფლანგავს ამდენ ფულს და რატომ დაუკარგა ფონდს თავისი ავტორიტეტი და ფუნქცია?“ – კითხულობდა აღშფოთებული ივანიშვილი, რომელიც მერე დაარწმუნეს, რომ საგანელიძე თანამდებობაზე ჯერჯერობით დაეტოვებინა.

საქმე ეხებოდა საპარტნიორო ფონდის მიერ დაფინანსებულ პროექტებს, სადაც კორუფციის „სურნელი“ ტრიალებდა. დიდი სკანდალები იყო “რეპუბლიკურის” (რომელიც “საპარტნიორო ფონდის” ბალანსზეა) ყოფილი ხელმძღვანელისა და ფონდის დაპირისპირების დროს, როდესაც ავთანდილ იმედაძე ფონდს ბრალდებებს უყენებდა, რომ დაკისრებულ ვალდებულებას არ ასრულებდა და თანხები მათთან არ მიდიოდა. მოგვიაინებით, საპარტნიორო ფონდმა სკანდალის ჩასახშობად იქ აუდიტი თავადვე შეიყვანა.

ეს ამბავი მაშინ პრესაში არაერთხელ გაშუქდა, რაც იმით დასრულდა, რომ “ხმაურიანი” იმედაძე გადააყენეს და მის ნაცვლად თანამდებობაზე ლევან გოფოძე დანიშნეს.

ავად თუ კარგად, საგანელიძე არჩევნებამდე თანამდებობაზე დარჩება და მერე ხახამშრალს დატოვებენ. ამიტომაც ის თავისი ბიზნესების მფარველსა და ზურგს ეძებს, განსაკუთრებული ინტერესები რაჭაში აქვს და სწორედ ეს იყო მიზეზი, რომ ფსონი არჩილ ჯაფარიძეზე გააკეთა.

საგანელიძე 4 თვეა ცოლ-შვილით რაჭაშია და იქ ინტრიგებს ხლართავსო, ამბობს წყარო და ამის დასტურად სწორედ არჩილ ჯაფარიძის მაჟორიტარობის სურვილს ასახელებს. ის გოჩა ენუქიძისგან განსხვავებით, ადვილი სამართავია და საგანელიძემ ივარაუდა, რომ თუ მას გაქაჩავს და ენუქიძეს „ჩააჩოჩებს“, რეგიონი მისი არაოფიციალური საფაშო გახდებოდა…

მოკლედ, საგანელიძე პრაქტიკულად ივანიშვილს დაუპირისპირდა ამ გადაწყვეტილებით, რასაც ბატონი ბიძინა არავის პატიობსო, ამბობს ჩვენი წყარო.

თავად არჩილ ჯაფარიძეს ამ თემაზე კომენტარი არ გაუკეთებია და ალბათ არც აპირებს, როგორც ჩანს, მიხვდა, დიდი აფიორის ნაწილად რომ იქცა.

ანი დვალიშვილი, ალია №21