ევროპის საბჭოს ადამიანის უფლებათა კომისარი საქართველოს სახალხო დამცველს შეხვდა

ევროპის საბჭოს ადამიანის უფლებათა კომისრისა და საქართველოს სახალხო დამცველის, ლევან იოსელიანის შეხვედრა დასრულდა.

ომბუდსმენის განცხადებით, მხარეებმა ლევან იოსელიანის მიერ მომზადებული და პარლამენტში წარდგენილი წლიური ანგარიში განიხილეს.

ამასთან, მაიკლ ო’ფლაერტი სინდისისა და პოლიტიკური პატიმრების მდგომარეობით დაინტერესდა და სახალხო დამცველთან “ქართული ოცნების” მიერ გამკაცრებულ კანონმდებლობაზე ისაუბრა.

იოსელიანის თქმით, ევროპის საბჭოს ადამიანის უფლებათა კომისარმა კითხვები დასვა იმის შესახებაც, იყო თუ არა რომელიმე ადამიანი დასჯილი, ვინც აქციების დროს მომიტინგეების ცემაში იღებდა მონაწილეობას.

ძალიან მნიშვნელოვანი შეხვედრა იყო, რა ტქმა უნდა, შეხვედრა შეეხებოდა ადამიანის უფლებათა მდგომარეობას ზოგადად საქართველოში. აინტერესებდა მათ შორის მე, როგორც სახალხო დამცველი, რა პროცესში ვარ ჩართული და იმ ანგარიშში, რომელიც წარვადგინეთ პარლამენტში, ამ ანგარიშის ირგვლივ იყო საუბარი. 

რამდენიმე საკითხს გაესვა ხაზი, მათ შორის საოკუპაციო ხაზის გასწვრივ მცხოვრები ჩვენი მოქალაქეების მდგომარეობას, პროტესტის შედეგად დაკავებული ადამიანების მდგომარეობას, ვინც ახლა საპატიმროშია და ამავე დროს დაისვა კითხვები, არის თუ არა ვინმე პასუხისგებაში მიცემული, ვინც შეიძლება იყოს დამნაშავე იმ ადამიანების ცემაში, ვინც იმ პერიოდში იყვნენ ნაცემი და ამავე დროს, ერთ-ერთი საკითხი იყო ზოგადად ორგანიზაციების მდგომარეობა საქართველოში, ბოლო ცვლილებები, საკანონმდებლო პაკეტი, რომელიც პარლამენტში იქნა მიღებული და ა.შ..

ამის ირგვლივ იყო ძირითადად საუბარი, ძალიან კარგი შეხვედრა იყო და იმედი მაქვს, რომ ეს ჩვენი პარტნიორული ურთიერთობა, რომელიც უკვე 2 წელია მაკავშირებს ბატონ ო’ფლაერტთან, ასევე კარგად გაგრძელდება,” – განაცხადა ლევან იოსელიანმა. 

ახალი ანგარიში საქართველოში ადამიანის უფლებების დარღვევაზე, სავარაუდოდ, მომავალ კვირას გამოქვეყნდება.

საქართველოს სახალხო დამცველამდე მაიკლ ო’ფლაერტი არასამთავრობო ორგანიზაციების წარმომადგენლებსაც შეხვდა. (tv pirveli)