“მინდა ტყვეობიდან გთხოვოთ – არ მიატოვოთ ჩემი ძაღლები” – მიშა კაჭკაჭიშვილი

მინდა აქედან, ჩემი ტყვეობიდან, ხმა მივაწვდინო თითოეულ თქვენგანს. თქვენ იცით, რომ ჩემთვის ბრძოლა — ეს არის ბრძოლა სიცოცხლისთვის, ღირსებისთვის და იმ არსებებისთვის, რომლებსაც საკუთარი ხმის ამოღება არ შეუძლიათ.

დღეს ჩემი გული მათთანაა — ჩემს ასზე მეტ ერთგულ ძაღლთან და კატასთან. ისინი წლების განმავლობაში იყვნენ ჩემი დასაყრდენი, ჩემი უპირობო სიყვარულის წყარო. ახლა, როცა მე ფიზიკურად მათ გვერდით ყოფნა და მათი მოვლა არ შემიძლია, ისინი დარჩნენ ბედის ანაბარა.

მინდა ყველამ იცოდეთ ეს ცხოველები ჩემი ოჯახის წევრები არიან. მე მათ საკუთარი ხარჯებით, ყოველგვარი დახმარების გარეშე ვუვლიდი წლების განმავლობაში. ახლა, როცა მე იზოლაციაში ვარ, ასზე მეტი სიცოცხლე დღეს თქვენს იმედათაა. მათ სჭირდებათ საკვები, მოვლა და ის სითბო, რასაც მე აქედან ვერ ვაწვდი.

მიუხედავად იმისა, რომ ჩემი თავისუფლება შეზღუდულია, ჩემი პასუხისმგებლობა მათ წინაშე უცვლელია. მე არასდროს მითქვამს უარი სხვის დახმარებაზე, არც ფინანსურად და არც მორალურად. დღეს კი მე გთხოვთ თქვენ — დაუდექით გვერდით ამ უცოდველ არსებებს.

ნუ მისცემთ უფლებას ჩემს მიმართ ანგარიშსწორებას, გაანადგუროს ის, რაც ამდენი შრომითა და სიყვარულით შევქმენით.

გთხოვთ, არ მიატოვოთ ჩემი ძაღლები. ისინი ჩემი ნაწილია.

მადლობა და

მალე შევხვდებით თავისუფლებაზე!