ტაბახმელას გზაზე საკუთარ ავტომობილში ახალგაზრდა ქალის ცხედარი იპოვეს. არსებული ინფორმაციით, მას თავის არეში ცეცხლსასროლი იარაღით მიყენებული ჭრილობა აღენიშნება. გარდაცვლილია ახალგაზრდა ქალი, 39 წლის ელენე ჯანჯღავა, – ერთ-ერთ კერძო სკოლის წარმატებული პედაგოგი, ის გეოგრაფიას ასწავლიდა და ასევე, იყო „დიოგენეს“ X კლასის გეოგრაფიის სახელმძღვანელოს თანაავტორი.
როგორც ამბობენ, ელენე სკოლაში უნდა მისულიყო, თუმცა არ მისულა. რადგან ეს უჩვეულო იყო, სკოლის თანამშრომლებმა დილიდანვე დაიწყეს მისი ძებნა. სამწუხაროდ, დღის მეორე ნახევარში კოჯრის გზაზე მისი ავტომობილი და მანქანაში გარდაცვლილი ქალი იპოვეს.
“ამ დილით გაკვეთილზე უნდა მოსულიყო და არ მოვიდა. წავკისში ცხოვრობდა, მანქანა ჰყავდა და სკოლაში თავისი მანქანით დადიოდა. გასულ კვირას არდადეგები გვქონდა. ახლა სწავლა დავიწყეთ და 9 საათზე ელენეს პირველი გაკვეთილი უნდა ჩაეტარებინა. რადგან არ მოვიდა სკოლაში, დავიწყეთ მისი ძებნა. ზოგადად, ძალიან პასუხისმგებლიანი ადამიანი იყო და გამორიცხული იყო, არ დაერეკა ან თუ აგვიანდებოდა არ გაეფრთხილებინა ადმინისტრაცია.
საათის შემდეგ, მეორე გაკვეთილის მიმდინარეობის დროს, მთელი კოლექტივი აქტიურად ჩაერთო მის ძებნაში, ყველა ცდილობდა მასთან დაკავშირებას. მერე ოჯახსაც მიმართეს. როგორც ვიცი, ოჯახმა უპასუხა, რომ ელენე სახლიდან დილის 8:00-ზე გავიდა და გასაგები გახდა, რომ ამ შუალედში რაღაც მოხდა. ყველაფრის დაშვება შეგვეძლო, ავარიის… მაგრამ ეს იყო სრულიად წარმოუდგენელი რამ. რადგან მართლა ძალიან პოზიტიური გოგო იყო ელენე. თუ პრობლემა ჰქონდა სახლში, იტყოდა, მაგრამ…თუ პრობლემა ჰქონდა სახლში, იტყოდა, მაგრამ…ადამიანია და არასდროს არ ვიცით სხვის გულში რა ხდება. როგორც გითხარით, არ ემჩნეოდა სტრესი, არაფერი მსგავსი…
ორი შვილის დედა… უფროსმა სკოლა დაამთავრა, პატარა ჩვენს სკოლაში სწავლობს და ერთად მოდიოდნენ ხოლმე დედა-შვილი სკოლაში. როგორც ჩანს, ბავშვი ამ დილით არ წამოუყვანია.
ნიჭიერი და წარმატებული პედაგოგი იყო, – გეოგრაფიის სახელმძღვანელოს თანაავტორიც. საოცრად მშრომელი, შრომისმოყვარე გოგო აღარ გვყავს და ძალიან განვიცდით. არ ვიცი რა ვთქვა, ზოგადად, შეუძლებელია ალბათ ბოლომდე ადამიანის შინაგანი მდგომარეობისა და ემოციების გამოცნობა. ყველაზე სამწუხარო ვარიანტსაც განვიხილავდით – ავარიას, მაგრამ ასეთი შოკისმომგვრელი ვერსია არც განხილულა სკოლაში. დაუჯერებელია”, – განუცხადა “კვირის პალიტრას” მომხდარით შეძრულმა ელენეს კოლეგამ.
ახლობლებს ვერ აუხსნიათ რატომ უნდა მოეკლა ელენეს თავი. მათივე თქმით, არ შეუმჩნევიათ, რომ ჰქონდა პრობლემები. ამიტომ ვერ საუბრობენ მომხდარის მიზეზებზე. „გადასარევი თანამშრომელი იყო. ძალიან პოზიტიური, ყველანაირად დადებითად შემიძლია დავახასიათო, სხვას ვერაფერს გეტყვით”, – ამბობს მისი კიდევ ერთი კოლეგა.
„გაოგნებული ვარ მომხდარით, ვიცნობდი ელენეს, ძალიან კარგი ადამიანი იყო. ვერ ამიხსნია რატომ უნდა მოეკლა თავი. სულ მომღიმარი სახით გხვდებოდა. ძალიან დიდი ტკივილია, არ ვიცი რა პრობლემა უნდა ჰქონოდა, რომ თავი მოეკლა, მიჭირს ამის დაჯერება. ასეთი სიცოცხლით სავსე გოგო აღარ არის. სახლიდან მიმავალ გზაზე იპოვეს მანქანა, სადაც გარდაცვლილი ნახეს”, – ამბობს გარდაცვლილის კიდევ ერთი ახლობელი.
ცხედარს ექსპერტიზა ჩაუტარდება და ექსპერტები დაადგენენ რეალურად ეს იყო თვითმკვლელობა თუ იყო მკვლელობა.
ჯერჯერობით მომხდარზე კომენტარი არ გაუკეთებია შინაგან საქმეთა სამინისტროს. უცნობია, რა ვერსიებზე მუშაობს გამოძიება. საიდან მოხვდა პედაგოგის ხელში ცეცხლსასროლი იარაღი ან რატომ მოიკლა მან თავი. ბევრი კითხვა ჯერჯერობით პასუხგაუცემელია.
წყარო: კვირის პალიტრა
კომენტარები