“სერპანტინი”, რომელიც ღარიბაშვილის ოჯახური კლანის გამდიდრების წყარო და სკანდალური ისტორიებით ცნობილი კომპანია იყო, კვლავ გააქტიურდა.
თავდაცვის მინისტრი, ირაკლი ღარიბაშვილი, რომელიც თითქოსდა კორუმპირებულ ნათესავებს აღარ ელაპარაკებოდა, ახლა, როგორც ჩანს, თავის ფავორიტ კომპანიებს ტენდერებში აბრუნებს.
მაგალითად: რამდენიმე დღის წინ – 2020 წლის 15 ივნისს, თელავის მუნიციპალიტეტის მერმა, შოთა ნარეკლიშვილმა, ხელშეკრულება გააფორმა შპს “სერპანტინთან”.
ხელშეკრულების საგანია თელავში, მეგობრობის ქუჩის სარეაბილიტაციო სამუშაოების შესყიდვა, რომელიც ადგილობრივ ბიუჯეტს 489,080 ლარი უჯდება.
მანამდე, კერძოდ კი, 2020 წლის 28 აპრილს, თელავის მუნიციპალიტეტის მერმა ნერეკლიშვილმა, იგივე “სერპანტინს” 294,582 ლარის ღირებულების კონტრაქტი დაუდო, სოფელ კისისხევში შიდა საუბნო გზების რეაბილიტაციის შესახებ.
როგორც ჩანს, “სერპანტინი”, რომელსაც ბიუჯეტიდან 2012 წლიდან, ღარიბაშვილის პრემიერობის ჩათვლით, 100 მილიონ ლარზე მეტის ტენდერი აქვს წაღებული, ახლა ისევ “ამოტივტივდა”.
კომპანია “სერპანტინის” 69 პროცენტიანი წილის მფლობელი თამარ ჯანყარაშვილია, ღარიბაშვილის ყოფილი მოადგილისა და ახლო მეგობარის, გიორგი ზედელაშვილის დედა და შს გენინსპექციის ყოფილი უფროსის, ღარიბაშვილის სიმამრ თამაზაშვილის დისშვილის, ზვიად ჯანყარაშვილის მამიდა.
“სერპანტინის” მიერ მოგებული ტენდერები კი, საეჭვოდ დაემთხვა ცოტა ხნის წინ, ივანიშვილის მიერ მიღებულ გადაწყვეტილებას, რომლის მიხედვითაც 2020 წლის საპარლამენტო არჩევნებზე, კახეთი ირაკლი ღარიბაშვილს ჩააბარეს.
სწორედ ირაკლი ღარიბაშვილი იქნება პასუხისმგებელი საპარლამენტო არჩევნებში ქართული ოცნების მიერ კახეთში აღებულ ხმებზე.
თუმცა, თუ მისი ოჯახური კლანის კუთვნილი კომპანიის მიერ მოგებულ ახალ ტენდერებს გავითვალისწინებთ, თავდაცვის მინისტრი, ივანიშვილის დაკისრებულ არაოფიციალურ პასუხისმგებლობას კახეთზე, თავის პირად და შესაძლოა, მერკანტილურ ინტერესებსაც მშვენივრად უთავსებს.
პრესა.ჯი
კომენტარები