“ქართული ოცნების” მომხრეები როგორ ამართლებენ ამას?” – ლევან ლორთქიფანიძე

პოლიტოლოგი, ლევან ლორთქიფანიძე:

“ბათუმელები” იუწყებოდა:

“საქართველოს პირველი ქალი გემის კაპიტანი ჰყავს”. 

ტკივილის, შეურაცხყოფისა და ღალატის ეპოქაში, როგორი სასიამოვნოა ასეთი ამბის გაგება. საქართველოს საზღვაო ტრანსპორტის სააგენტომ, როგორც ქვეყნის ეროვნულმა საზღვაო ორგანომ, ნათია ლაბაძეს კაპიტნის წოდება მიანიჭა.

წარმომიდგენია, რა რთული გზა გაიარა ქ-ნმა ნათიამ ამ მწვერვალამდე, მაგრამ მაინც მიაღწია მიზანს. ალბათ, მრავალჯერ გადალახა ეკვატორი, არაერთხელ ჩახედა თვალებში შტორმს, დიდი შრომით მოამზადა ორგანიზმი სხვადასხვა კლიმატთან შესახვედრად, შეისწავლა გემის მექანიზმი, მეზღვაურებთან ურთიერთობის ეთიკა. დღეს ქ-ნი კაპიტანი უკვე მათი თანასწორია, ვინც ქალის ამ საფეხურზე დაწინაურებას არასდროს ელოდა.

მემარცხენე მთავრობა რომ გვეყოლება, ფლოტს ვერა, მაგრამ მოწესრიგებულ და ჩვენი ქვეყნისთვის შესაფერის საზღვაო ინფრასტრუქტურასა და აკვატორიას შევქმნით, თევზჭერასაც მივყოფთ ხელს, შავი ზღის უსაფრთხოების სისტემაშიც ჩავერთქვებით ჩვენი ხომალდებით, და მაშინ კაპიტნის გამოცდილება დიდ დახმარებას გაგვიწევს.

“მაგრამ ხანგრძლივ ეს სოფელი გაახარებს ვინმეს განა?”

ტელეფონთან მობრუნებულს დამხვდა ცნობა, რომ საქართველოში სასამართლო ტროტუარზე დგომის გამო ადამიანებს ციხეში უშვებს. ვერ შეფუთავთ! ადამიანებს იჭერენ ტროტუარზე დგომისთვის და მეტი არაფრისთვის!

ნეტავ “ქართული ოცნების” მომხრეები როგორ ამართლებენ ამას? სინდისი, ნამუსი არ აწაუხებთ ამგვარი დაცემის გამო?

თუმცა, ჩვენთან ღირებულებებს, იდეებს ხომ დასცინიან. მათზე მნიშვნელოვანი არის ერთი ჯგუფის სარგებელი. გვიპასუხებენ, რომ ასეა საჭირო, რათა მომიტინგეები მოახრჩონ ანაკონდას სტრატეგიით. შეიძლება ვნებიანი შორისდებულებიც აღმოხდეთ: “უუუუხ! რა ჭკვიანურია ტროტუარებზე ხალხის დაჭერა… უუუუხ! რა მაგრა მოიფიქრეს! ვიიიიშ”.

მიეცით ყველაფრის უფლება, დახუჭეთ ყველაფერზე თვალი და ეს აქლემი თქვენს კართანაც დაიჩოქებს.

მგონი, ამის თქმაც აღარ ღირს. ამ პროპაგანდამ ისე მოუქცია ზოგიერთს საქმე, შვილები და შვილიშვილები რომ დაუჭირონ, იტყვიან ღირსები არიანო. ან ფეხებზე ჰკიდიათ, მაინც გახიზნული ჰყავთ თავიანთი საყვარელი ადამიანები და ჩვენ, ვინც ვერ შევძელით აქაურობის მიტოვება და არც ავტორიტარიზმს ვეგუებით, გადავჩეხილვართ! თვითონ ხომ აქვთ სანახაობა და სავიშვიშო…