ოპოზიციაზე საუბარს იმით დავიწყებთ, რომ მომავალ კვირაში ძალოვნები აუცილებლად შეისწავლიან ერთ-ერთი ტოტალიზატორის ფინანსურ საქმიანობას. უფრო კონკრეტულად კი, ერთ-ერთი ყველაზე მსხვილი ქსელური სლოტ-კლუბების მფლობელებს მძიმე დღეები ელით. მიზეზი მარტივია – თავის დროზე, ამ სლოტ-კლუბებს ვანო მერაბიშვილის ხალხი აკონტროლებდა. მისი დაჭერის შემდეგ, მფლობელი შეიცვალა, თუმცა მხოლოდ ფურცელზე და ის ფორმალურად გადაფორმდა მეზობელი ქვეყნის მოქალაქეზე, რეალური პატრონი კი ისევ ძველი დარჩა. ჰოდა, როგორც გვეუბნებიან, ციხიდან გამოსულ მერაბიშვილს, სოლიდური ფინანსური დახმარება სწორედ ამ კაცმა გაუწია და ახლა ერთი შეხედვით ხელშეუხებელ სფეროს მსუყე ფრთას ჩამოაჭრიან.
ეს სფერო კი ხელშეუხებელი ერთადერთი მიზეზის გამოა – იქ წლის განმავლობაში იმაზე მეტი ფული ტრიალებს, ვიდრე საქართველოს ბიუჯეტში (თან ეს ოფიციალური მონაცემებით) და რაღა თქმა უნდა, სადაც დიდი ფულია, იქ თვალი ბევრ რამეზე უფრო ადვილად იხუჭება. სხვაგვარად, რატომ არის, რომ მაგალითად, რეგისტრაცია ინტერნეტის მეშვეობით მარტივად ხდება, ხოლო თუ რეგისტრაციის გაუქმება გინდა, აუცილებლად სათაო ოფისში უნდა მიხვიდე?! თანაც, როცა მშობელი მიდის და ეუბნება, რომ მისი პირადობის მოწმობის ნომერი დაბოლკონ, რადგან არასრულწლოვანი შვილი მისი პირადობით არის დარეგისტრირებული, დაბლოკვაზე უარს ამბობენ. ანუ, ოფისში მისულ მშობელს რეგისტრაციას კი უუქმებენ, მაგრამ შვილს, რომელმაც დედის ან მამის პირადი ნომერი ზეპირად იცის, მეორე დღესვე შეუძლია რეგისტრაციის გავლა.
თუმცა, ამ თემაზე სხვა დროს და უფრო ვრცლად, მითუმეტეს, ვამზადებთ მასალას, სადაც დეტალებში მოგვიყვებიან, როგორ არ გადაუხადა ერთ-ერთმა უდიდესმა კაზინომ თანამშრომლებს პანდემიის დროს ხელფასი, როგორ აიძულა განცხადების დაწერა ყველას, რომ ხელფასზე უარს ამბობდნენ მანამ, სანამ კაზინო მუშაობას არ დაიწყებდა და წინააღმდეგობის გაწევის შემთხვევაში, როგორ დაემუქრნენ სამსახურიდან გაშვებას.
ანი დვალიშვილი, ალია №20
კომენტარები