პარტია თავისუფლების მოედნის ერთ-ერთი ლიდერი და ეროვნული სასწავლო გეგმებისა და შეფასების ცენტრის ყოფილი დირექტორი, სიმონ ჯანაშია კობახიძის განათლების რეფორმას ეხმაურება და აცხადებს, რომ ისინი, ვინც მომავალ წელს და შემდეგ წლებში აპირებენ უმაღლეს სასწავლებლებში ჩაბარებას, სწავლა დაუფინანსდებათ 63 უნივერსიტეტიდან მხოლოდ 19-ში.
“ქართული ოცნება აუქმებს საგრანტო დაფინანსებას, რაც ნიშნავს იმას, რომ 63 უნივერსიტეტის ნაცვლად, თქვენ დაგიფინანსდებათ სწავლა მხოლოდ 19 უნივერსიტეტში.
სპეციალობების უმეტესობა ამ 19 უნივერსიტეტიდან მხოლოდ 2-ში იქნება. მაგალითად სამართლის შესწავლა შესაძლებელი იქნება მხოლოდ თბილისის სახელმწიფო უნივერსიტეტში და ქუთაისის უნივერსიტეტში, ეს შეამცირებს მისაღებ რაოდენობებსაც, ანუ უფრო რთული გახდება თქვენთვის ჩაბარება და ასევე უნდა იცოდეთ, რომ 4-წლიანი ბაკალავრიატის ნაცვლად, დაგიფინანსდებათ მხოლოდ 3-წლიანი ბაკალავრიატი.
ახლა დასვით კითხვა კარგია თუ არა 63-ის ნაცვლად, 19-ში, რომ დაგიფინანსდებათ სწავლა, 19-დან მხოლოდ 2-ში, რომ იქნება სპეციალობების უმეტესობის სწავლა შესაძლებელი, რთული რომ გახდება ჩაბარება და 4 წლის ნაცვლად, 3 წელი, რომ დაგიფინანსებენ სწავლას.” – თქვა ჯანაშიამ.
ცნობისთვის, ივანიშვილის განათლების მინისტრმა, გივი მიქანაძემ 3 დეკემბერს, რუსთავი 2-ის ეთერში უნივერსიტეტების სახელმწიფო გრანტებთან დაკავშირებით ცვლილებებზე ისაუბრა, რომლის მიხედვითაც, 2026 წლიდან ყველა სტუდენტი, რომელიც სახელმწიფო უნივერსიტეტში ჩააბარეს, უფასოდ ისწავლის.
რაც შეეხება კერძო უნივერსიტეტებს, მოქმედ სტუდენებს არსებული გრანტები შეუნარჩუნდებათ, 2026 წლიდან კი კერძო უნივერსიტეტების პირველკურსელები სახელმწიფოსგან დაფინანსებას ვეღარ მიიღებენ.
კომენტარები