“დანამდვილებით შემიძლია ვთქვა, რომ ივანიშვილის რეჟიმი გაიფხრიწება ნაკერავზე” – ჯანგირაშვილი

ჟურნალისტი, ნინო ჯანგირაშვილი:

არ მახსენდება ხელისუფლება, რომელსაც საკუთარი მოქალაქეების ნაწილის ქვეყნიდან განდევნის მიზანი ოფიციალურად აქვს გაცხადებული. ჯერ კიდევ წლების წინ ივანიშვილმა გვითხრა, აქ ვერ დაგასაქმებთ ათწლეულები, ევროპაში დაგასაქმებთო. ახლა ქოცპროპაგანდისტები გვეუბნებიან ვისაც არ მოგწონთ აქ რაც ხდება წადითო. ყველაფერში ჩანს მიზანი, რომ აქტიური ადამიანების ქვეყნიდან განდევნა უნდათ რომ მერე თავისებური წესრიგი დაამყარონ.

ასე ღიად გაცხადებული პუტინსაც კი არ ქონია განსხვავებულად მოაზროვნეების ქვეყნიდან გაყრა. უბრალოდ ასე მოხდა. ათასობით რუსი გაექცა რეჟიმის მზარდ რეპრესიულ მანქანას და პუტინი კომფორტულად მოკალათდა სამუდამოდ. არავინ აღარ უქმნის დისკომფორტს. დარჩენილებმა დაინახეს, რომ შანსი არ აქვთ და გაჩუმდნენ ყველაფერზე. დაახლოებით იგივე მოხდა ბელორუსში. ახლა რუსული მოდელი როგორც ჩანს წარმატებულ გამოცდილებად ჩაითვალა და ქოცს ასწავლეს რუსებმა, რომ პირდაპირ ეს გზა უნდა გაიმეორონ. და ესენიც ნაბიჯ–ნაბიჯ მიყვებიან რუსეთის შპარგალკას.

ამიტომ, თუნდაც არგაქცევა და დარჩენა არის მნიშვნელოვანი ამბავი. პროტესტის გამოხატვა ნებისმიერი ფორმით არის მნიშვნელოვანი ამბავი. ამ ომს არ წავაგებთ, სანამ ჩვენ თვითონ არ ვაღიარებთ, რომ წავაგეთ და არ დავნებდებით. გვახსოვდეს, რომ დრო ივანიშვილის წინააღმდეგ მუშაობს. დღეს შეიძლება პირიქით ჩანს, მაგრამ დანამდვილებით შემიძლია ვთქვა, რომ ივანიშვილის რეჟიმი გაიფხრიწება ნაკერავზე. ხვალ რომ ბევრნი უნდა ვიყოთ ქუჩაში, ეგ ვიცით, თავისთავად.