“იცოდეთ ციხეში რა ხდება – ანალგინს ერთი კვირა ველოდები” – ვლადიმერ გველესიანი

4 ოქტომბრის საქმეზე დაკავებულმა ვლადიმერ გველესიანმა სასამართლო პროცესზე ციხეში არსებულ მდგომარობაზე საუბრისას, თქვა:

„მადლობა, რომ ასეთი ვარ და ვიცავ ჩემს ქვეყანას… კვირა-ნახევარია ელასტიური ბინტი არ მომიტანეს, ამას იმისთვის გეუბნებით, რომ იცოდეთ, იქ რა ხდება. ანალგინს რომ ერთი კვირა ველოდები, ამასაც შეგახსენებთ ბატონო პროკურორო. მართლაც ვერ გამიგია რა დავაშავე,

ეს ადამიანები დღეს გავიცანი, მადლობა ღმერთს რომ გავიცანი. ჯგუფურ ძალადობას გვედავებიან, ძალადობა არის როცა ურტყამ, რაღაცას ესვრი, ერთი ფაქტიც არაა, რომ მსგავსი რამ, გავაკეთე, საიდან მოგაქვთ ეს ჯგუფური ძალადობა?

პროკურატურაში რამე დევიზი გაქვთ, ჯგუფურ ძალადობაზე ყველანი ციხეშიო? ერთ წელს დამაჯენთ თუ ორ წელს, არ აქვს მნიშვნელობა. სად უნდა დავიმალო? დამალვა კი არა, ქუდსაც არ დავიხურავ. ჩემო ხალხო, იბრძოლეთ, თქვენი სამშობლოსთვის, ყველას გამძლეობა მოგცეთ სულიერიც და ფიზიკურიც. ახლა მეტი დრო მომეცა საკანში მეტი გავიაზრო, ამიტომ ჩემს შვილებს ვეტყვი, რომ თავი აწიონ და არ დახარონ, მე აქ არ ვზივარ რამე სამარცხვინოსთვის, მე ვზივარ ჩემი სამშობლოსთვის, და არა “გრუზიასთვის”.

ბატონო პროკურორო, შემომხედეთ თვალებში, მე ვძალადობდი ჯგუფურად? ან ამ ხალხთან რა მაქვს საერთო, ან ძალადობასთან? რამე სასწაული დისკია? გვაჩვენეთ რა გაქვთ. რომელ მოწმეებზე უნდა გავაკეთო ზემოქმედება, ვინ უნდა დავაშინო? მე თუ ჩვეულებრივი მოქალაქე ვაშინებ პოლიციელებს, მთლად წალეკილა შსს. მე მყავს ოჯახი, ორი შვილი და დედა, დედა რომელიც ჩემს იმედზე იყო, ამიტომ კიდევ ერთხელ ბოდიშს ვუხდი მას. ჩვენ არ ვართ დამნაშავეები”,- განაცხადა გველესიანმა.

ცნობისთვის, ვლადიმერ გველესიანს, ზურაბ ჭავჭანიძეს, სერგო მეგრელიშვილს, გიორგი რურუას, ამირან დოლიშვილს, ანტონ ვარდანიძეს, გიორგი ქორქიას, ალექსანდრე ჩილაჩავას, გენადი კუპრეიშვილს, ლაშა ივანაძეს, ლევან ჯიქიას, სულხან ტუღუშს, ხვიჩა გოგოხიასა და რამაზ მუმლაძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინათ, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მათ ბრალდება სსსკ-ის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს.