ყოფილი პრემიერის, გიორგი გახარიას გუნდის წევრმა, გიორგი შარაშიძემ, დღეს, სპეციალურ ბრიფინგზე განაცხადა, რომ “გახარია საქართველოსთვის” პარლამენტში შედის.
მან თქვა, რომ “ამ ქვეყანაში არსებობს სხვა სიმართლეც” და ეს უნდა გამოიტანონ სააშკარაოზე, პარლამენტის ტრიბუნიდან. ბრიფინგზე გაჟღერდა კიდევ ერთხელ, რომ ორი მხარეა და ორივე რადიკალური. რუსთაველზე მდგომ ადამიანებს, პოლიტიკურ პატიმრებს და მათ ოჯახებსაც რადიკალებად მიიჩნევენ, ქართული ოცნების მსგავსად?, – ამაზე ბრიფინგის ტექსტში შარაშიძე არ საუბრობს.
მოგვიანებით, პარტიამ “გახარია საქართველოსთვის” შარაშიძის ბრიფინგის ტექსტი, სადაც პარლამენტში შესვლაზე იყო საუბარი, 5 დამატებით ენაზე გაავრცელა და ეს ენებია: ინგლისური, ფრანგული, ჩეხური, სლოვაკური და რუსული ენები.
“ალია” დაინტერესდა, რატომ გაავრცელეს ბრიფინგის ტექსტი რუსულ ენაზე, პარტიამ გვიპასუხა:
ჩვენ გვყავს თანამშრომელი, რომელმაც იცის ეს 5 ენა და ვთარგმნეთ. შევეცადეთ, რომ ინფორმაცია ჩვენი ქვეყნის მოქალაქეებისთვის მაქსიმალურად მისაწვდომი იყოს, მათ შორის, ეთნიკური უმცირესობებისთვის.
“ალიამ” იკითხა, რომელი ეთნიკური უმცირესობისთვის ითარგმა სლოვაკურ ენაზე, ან რუსულ ენაზე ტექსტი, – გახარიას პარტიამ ამ კითხვას არ უპასუხა.
“ალიამ” იკითხა, რატომ არ გავრცელდა სომხურ და აზერბაიჯანულ ენებზე ბრიფინტის ტექსტი, თუმცა, არც ამ კითხვაზე გვაქვს პარტიის პასუხი.
კომენტარები