“პირბადის საქმე” – “მე, არც მსხვერპლი ვარ, არც დამნაშავე!” – „ერთმანეთისთვის 24/7-ის” ხელმძღვანელი გამოიკითხა

“პირბადეების საქმეზე” თბილისის საქალაქო სასამართლოში მაგისტრი მოსამართლის თანდასწრებით, ფონდ „ერთმანეთისთვის 24/7-ის” დამფუძნებელე, გუგა ხელაია გამოიკითხა.

კითხვები იყო ზოგადი შინაარსის და კიდევ ერთხელ დავრწმუნდი თუ რამდენად აბსურდულ საქმეს გვედავებიან – წერს ხელაია სოციალურ ქსელში.

მეგობრებო, დღეს ვიყავი საქალაქო სასამართლოში და “ფონდების საქმეზე” დამკითხეს მაგისტრი მოსამართლის წინაშე. კითხვები იყო ზოგადი შინაარსის და კიდევ ერთხელ დავრწმუნდი თუ რამდენად აბსურდულ საქმეს გვედავებიან…
აქვე, მეც ბევრმა დამიფიქსირა უკვე, რომ – “ყოფილიყავი შენთვის მშვიდად და წყნარად, აიიი რა გინდოდაო?!” თან ძირითადად უფროსი თაობის წარმომადგენლებმა და ბავშვობის მეგობრებმა… სოლიდარობაზე და ქველმოქმედებაზე, რომ ასეთი რეაქცია მივიღეთ პასუხად და მაგის მეტი არაფერი გაქვთ სათქმელი, ეგ თქვენი აზრით ნორმალურ, მშვიდობიან და სამართლიან გარემოში ცხოვრებას უდრის???
თან თქვენზე უკეთ არავინ იცის, რომ სიკეთის, ყურადღების, ზოგადად გაცემის და ადამიანების მიმართ გვერდში დგომის მოთხოვნილება მთელი შეგნებული ცხოვრება გაასმაგებული დოზით მაქვს და თქვენც ხშირად ყოფილხართ მაგ ყველაფრის ადრესატი ჩემგან. ასევე ისიც კარგად გემახსოვრებათ, რომ უსამართლობის მიმართ (კანონის ფარგლებში) პროტესტის გამოხატვა 14 წლის ასაკიდან ყოველწლიურ საქმედ მაქვს ქცეული… იმიტომ რომ ვერა და ვერ ეღირსა ეს ქვეყანა ნორმალურ პირობებში არსებობას.
მოკლედ, მხოლოდ ერთი სათხოვარით ვარ, რომ აღარ გინდათ ეს ხელოვნური დარდის და სითბოს გამოხატვა. თან არ მჭირდება და ტყუილად ნუ ხარჯავთ რესურსს… მე, არც მსხვერპლი ვარ, არც საბრალო და მითუმეტეს და რაც ყველაზე მთავარია, არც დამნაშავე!!!
ვისაც გულწრფელად გახსენდებოდით და ღელავდით ჩემზე, კიდევ ერთხელ უდიდესი მადლობა ყურადღებისთვის! არასოდეს არ დაგივიწყებთ! მაგრამ თან პირადად ჩემზე სანერვიულო არაფერია… ბეეევრად უარესი რეალობა დგას თითქმის ყველა მიმართულებით.
მოკლედ, სულ გვახსოვდეს, რომ სიმართლე არასოდეს დაიმალება და ვისაც ამ ქვეყნისთვის კარგის მეტი არაფერი გვსურს, აუცილებლად გავიმარჯვებთ! ხოლო უსამართლობის ჟამს, ვინ რომელ მხარეს იდგა, ეგ ხომ მითუმეტეს ვერ დაიმალება”, – წერს სოციალურ ქსელში გუგა ხელაია. 

„საბოტაჟისა და მტრულ საქმიანობაში დახმარების“ კვალიფიკაციით აღძრული საქმის ფარგლებში, საგამოძიებო უწყების მოთხოვნით, მიმდინარე წლის 17 მარტს მოულოდნელად დააყადაღეს იმ ფონდების და ორგანიზაციების („ნანუკას ფონდი“, „სირცხვილია“, „ფროსფერითი“, „ფონდი ერთმანეთისთვის 24/7“, „თბილისის ადამიანის უფლებათა სახლი“) ანგარიშები, რომლებიც პროევროპული აქციების მონაწილეთა ჯარიმებსა და საჭიროებებს ფარავდნენ. საქმე მოძრაობა „ერთიანი ნეიტრალური საქართველოს“ მიმართვის საფუძველზე თებერვალში აღიძრა.