“ატკატი” “ჯუტადან” – “ოქროს მოწმე” ბურჭულაძის საქმეში ღარიბაშვილს ასახელებს – გასცემს, თუ არა, ივანიშვილი ღარიბაშვილის დაჭერის ბრძანებას?

“შაბათის ფორმულას” ინფორმაციით, თავდაცვის ყოფილი მინისტრის, ჯუანშერ ბურჭულაძის საქმეში, ოფიციალურად ფიგურირებს ირაკლი ღარიბაშვილის სახელი.

მედიამ გამოაქვეყნა ზურაბ ტიკვაძის 18 ივლისის გამოკითხვის ოქმი:

ვინაიდან ვფლობ სოლიდურ კომპანიებს და ბიზნესებს, ვასილ მხეიძეს ვუთხარი, რომ მხოლოდ მის სიტყვას ვერ დავეყრდნობოდი და გარანტია მოეცა გადაწყვეტილების მიმღები თანამდებობის პირებისგან. დაახლოებით ერთ კვირაში “კია საქართველოს” ოფისში კვლავ მოვიდა ვასილ მხეიძე და მითხრა, რომ ელაპარაკა ჯუტას, იგივე ჯუანშერ ბურჭულაძეს, რომელმაც უთხრა, რომ თავის მხრივ ესაუბრა და შეუთანხმდა იმდროინდელ პრემიერმინისტრს ირაკლი ღარიბაშვილს, რომელმაც თანხმობა განაცხადა ჩემი კომპანიების, ამ საქმის შესყიდვებში მონაწილეობის მიღებაზე. 

მედიის ცნობით, ზურაბ ტიკვაძე ორჯერ, 15 და 18 ივლისს გამოიკითხა და გამოკითხვის ოქმები ურთიერთსაწინააღმდეგოა, პირველ ჩვენებაში ის ამბობს, რომ არავინ დახმარებია მთავრობიდან, გარიგებების დადებაში და მხოლოდ 18 ივლისის ჩვენებაში კი ის ვასილ მხეიძის, ჯუანშერ ბურჭულაძის და ირაკლი ღარიბაშვილის გვარებს ასახელებს და ამბობს, რომ “ატკატი” იყო თანხის 10 პროცენტი.

ღარიბაშვილის დაცვა მედიასთან ამბობს, რომ ყველაფერი ტყუილია და გამოკითხვაზეც კი არ იყო ირაკლი ღარიბაშვილი.