არ დასაჯოთ რიგითი მოქალაქეები უვიზო რეჟიმის გაუქმებით, მიზანში ამოიღეთ ნამდვილად პასუხისმგებელი პირები – მზია ამაღლობელი

საქართველოში ჩემი საკნიდან ევროპას ვემუდარები, რომ რუსეთის ხელში არ მიგვატოვოს, – ამ სათაურით გამოცემა The Guardian „ნეტგაზეთისა“ და „ბათუმელების“ დამფუძნებლის, დაკავებული ჟურნალისტის მზია ამაღლობელის სტატიას აქვეყნებს.

„ჩემი კოლეგა ჟურნალისტები ყოველდღიურად თავიანთ სიცოცხლეს საფრთხეში აგდებენ, მაგრამ ჩვენ უარს ვამბობთ დავნებდეთ იმ რეჟიმს, რომელიც თავად ევროპის უსაფრთხოებას საფრთხეს უქმნის. ჩემი საკანი მწვანე ფერშია, იმ ფერში, რომელსაც რედაქციაში ვიყენებდით. საწოლი ვიწროა, მაგრამ ჯერ არ გადმოვვარდნილვარ. როდესაც თავისუფალი ვიყავი, მაგრამ უკვე დაკავებას ველოდი, ვხუმრობდი, რომ ციხე კითხვის საშუალებას მომცემდა. მაგრამ აქ, რუსთავის N 5 ქალთა კოლონიაში, მხედველობა თითქმის დავკარგე. ამიტომ ახლა, მოახლოებულ სიბნელეში ვწერ იმ სიბნელის შესახებ, რომელიც ჩემს ქვეყანას, საქართველოს ნელ-ნელა მოიცავს. ბოლო რვა თვის განმავლობაში, ეს ჩემი ცხოვრებაა საქართველოს რეპრესიული რეჟიმის ქვეშ, რომელიც ცდილობს ჟურნალისტების გაჩუმებას, განსხვავებული აზრის ჩახშობასა და ჩვენი სულისკვეთების გატეხვას“, – წერს მზია ამაღლობელი.

მზია ამაღლობელი ევროპას მოუწოდებს, რომ საქართველოს სამოქალაქო საზოგადოებასა და დამოუკიდებელ მედიას მხარი დაუჭირონ.

„არ დასაჯოთ რიგითი მოქალაქეები უვიზო რეჟიმის გაუქმებით. მიზანში ამოიღეთ ნამდვილად პასუხისმგებელი პირები: „ქართული ოცნების“ პარტიის წარმომადგენლები და მათი ბიზნეს ქსელები. ხმა აიმაღლეთ ქუჩაში მყოფი ხალხისთვის, ციხეებში მყოფი ჟურნალისტებისთვის და იმ საზოგადოების დასაცავად, რომელიც დანებებაზე უარს ამბობს. საქართველოსთვის მხარდაჭერის აღმოჩენა არა სოლიდარობა, არამედ პრაგმატული არჩევანია. სამეზობლოში კიდევ ერთი რეპრესიული რეჟიმი თავად ევროპის უსაფრთხოებას საფრთხეს შეუქმნის. ახლა საქართველოს მიტოვება რუსეთის აგრესიის დასაჩუქრება იქნება“, – აცხადებს მზია ამაღლობელი.