,, მან შეცვალა პოლიტიკოსის აღქმის ჩვენებური ტრადიცია, რომლის მიხედვით, წინა პლანზე, ლიდერის პოზიციაზე, “ბამბანერკა” ტიპი უნდა იდგეს” – ქეთევან ენუქიძე ლევან ხაბეიშვილზე

,,შეაჩერე კორუფციის” დამფუძნებელი, ფილოლოგი ქეთევან ენუქიძე:

,,ლევან ხაბეიშვილი თანამედროვე პოლიტიკის ყველაზე ფეიერვერკულ, დინამიკურ, პულსირებად სახედ ჩამოყალიბდა.
მარტო ის რად ღირს, ყველა “ხაბედ” რომ მოიხსენიებს, თითქოს ბავშვობიდან იცნობს და ახლობელია…
და ამისთვის არავითარი პიარული სვლები და მანიპულაციები არ დასჭირვებია.
ეს ცოტას არ ნიშნავს საჯარო პირისთვის.
ჩვენ დიდხანს ვმეგობრობდით და მისმა პირველმა ნაბიჯებმა ჩემ თვალწინ გაიარა.
ხან ვეჯიჯღინებოდი, ხან რაღაც არ მომწონდა, ხან მაღიზიანებდა კიდეც, მაგრამ ერთი უდავო ფაქტია: თანამედროვე პოლიტიკოსებს შორის ასეთი უკომპრომისო, უშიშარი ტიპი არ მეგულება…
არც სახალხო (როგორც აღნიშნავენ ხოლმე)…
რა არ გაიარა, მაგრამ არც ლანძღვამ, არც ფიზიკურმა ანგარიშსწორებამ, საერთოდ არაფერმა – უკან დახევის ფიქრიც კი არ გააჭაჭანა მის გონებაში.
ბორკილების დადების დროსაც კი!
გული მტკიოდა, შარშანდელი ტრავმისგან დაზიანებულ მის თვალს რომ ვხედავდი, მაგრამ იმ გზამ მხოლოდ გააძლიერა და ზუსტად ვიცი, ციხიდან კიდევ უფრო ძლიერი და მტკიცე გამოვა.
მე მიხარია, რომ წაკბენების, ღია თუ ფარული შეურაცხყოფის, დაკნინების მცდელობის მიუხედავად, არასდროს შეუშინდა არც სნობებს და არც ფიზიკურ წინაღობას.
მეტიც! მან შეცვალა პოლიტიკოსის აღქმის ჩვენებური ტრადიცია, რომლის მიხედვით, წინა პლანზე, ლიდერის პოზიციაზე, “ბამბანერკა” ტიპი უნდა იდგეს.
არის დრო, როდესაც სიმტკიცე და სიმამაცე ბევრად მნიშვნელოვანია, ვიდრე თუნდაც ციცერონის რიტორიკა…
ძალიან ახალგაზრდაა ჯერ და ბევრი გამარჯვება აქვს წინ.
მხნეობას და წარმატებებს ვუსურვებ!
უპირობო მხარდაჭერას ვუცხადებ და პატივისცემას ვუდასტურებ!”