საქართველოს საზოგადოებრივ საქმეთა ინსტიტუტის (GIPA) პროფესორი, გიორგი კობერიძე:
ზოგადად ომში გამარჯვება მოვლენებისა და მოლოდინების ადეკვატურ შეფასებაზე გადის. წუხანდელმა თავდასხმამ პოლონეთზე აჩვენა ორი ფაქტი:
1. მოცემულ ეტაპზე, ნატო როგორც ერთიანი ალიანსი, პოლიტიკური თვალსაზრისით, არ არის მზად რუსეთის თავდასხმას ადეკვატური პასუხი გასცეს. საკვანძოა აქ პოლიტკური თვალსაზრისი – არ აქვს ალიანსს ის პოლიტიკური მზაობა, ერთობა და სიმტკიცე რომ მოსახლეობის, მოკავშირეების, ეკონომიკისა და სამხედრო ძალების მობილიზაცია განახორციელოს რუსული საფრთხის შესაკავებლად. ეს კი, როგორც მინიმუმ, უკრაინის ტერიტორიის 20 კილომეტრის სიღრმის არასაფრენად გამოცხადებაში შეიძლება გადათარგმნილიყო და არა იმაში შემთხვევითი ხომ არ იყო რუსული თავდასხმაო. აქვეა აშშ-ს არათანმიმდევრული პოლიტიკაც, რაც სიტუაციას პოლიტიკური თვალსაზრისით კიდევ უფრო ართულებს.
პოლიტიკური თვალსაზრისით-მეთქი იმიტომ ვწერ, რომ სამხედრო თვალსაზრისით შედარებით უკეთესი სიტუაციაა, თუმცა ისიც სხვადასხვა წევრის შემთხვევაში განსხვავდება, ხოლო სრულმასშტაბიანი და ახლა ბევრად კომპლექსური თავდაცვითი ომის წარმოებისათვის მზადყოფნა მთელი ალიანსის მასშტაბით კვლავ ადრეულ ეტაპზეა.
2. ევროპელებმა დაიწყეს საკუთრი უსაფრთხოებისათვის მზადება, მაგრამ ჯერ შუა ეტაპზე არიან. ცხადია ისინი ხვდებიან, რომ თავდასხმა არ იყო შემთხვევითი, მაგრამ იმის გამო რომ ახლა სრულად მზად არ არიან (როგორც აღვნიშნე, არც პოლიტიკურად და ნაწილობრივ არც სამხედრო კომპონენტში), ვერ სცემენ რუსეთს ადეკვატურ პასუხს. ბოლო სამი წლის განმავლობაში ნატოს ქვეყნებზე რუსული დრონებით თავდასხმა არაერთი შემთხვევა იყო, მაგრამ აქამდე არასდროს ჩამოუგდიათ დრონები. მაგრამ ახლა პოლონეთი სხვაგვარად მოიქცა და ჩამოაგდო. ეს ინდიკატორია იმისა, რომ ახლა პოლონეთი თავს უფრო მყარად გრძნობს, ვიდრე წინათ გრძნობდა. პოლიტიკურადაც, ევროპის მასშტაბით, მოსახლეობასთან მუშაობა აქტიურად მიმდინარეობს, განსაკუთრებთ ცენტრალურ და აღმოვლეთ ევროპაში. სამხედრო ბიუჯეტიც იზრდება. წარმოებაც მატულობს. წინა იერიშები იმის ინდიკატორი იყო, რომ შემდგომი თავდასხმისათვის უნდა მომზადებულიყო პოლონეთი და მოემზადა კიდეც. შემდგომში ალბათ უკეთეს შედეგს აჩვენებს კიდეც. პოლიტიკური თვალსაზრისითაც შედარებით უკეთესი სიტუაციაა იქ და ნაციონალისტურმა და მილიტარისტულმა რიტორიკამ სხვა რელსებზე გადაიყვანა პოლონეთი. მიახლოებით მსგავსი სურათი შეიძლება შეიქმნას აღმოსავლეთ ევროპის სხვა ქვეყნებშიც.
ახლანდელი თავდასხმა ევროპული უსაფრთხოებისათვის კიდევ ერთი ცივი წყლის გადასხმის ტოლფასი უნდა იყოს და დამატებითი სტიმული მისცეს უსაფრთხოებაზე ზრუნვის დაჩქარებისათვის. ტყუილად არ ითქვა უკრანელთა მხრიდან – სანამ ჩვენ რუსეთს ვაკავებთ ამით თქვენთვის დროს ვიგებთო.
რუკა: წუხანდელი თავდასხმის ტრაექტორია პოლონეთზე:
კომენტარები