“ამაყი ვარ რომ მას ვიცავ” – ასანთის კოლოფი და ქაღალდის ხელსახოცი – რას ედავებიან რეზო კიკნაძეს?

რეზო კიკნაძის ადვოკატმა, გუჯა ავსაჯანიშვილმა საბოლოო სიტყვის დროს განაცხადა:

მე ამაყი ვარ რომ მას ვიცავ და დავიცავ მის ინტერესს ყველა ინსტანციაში, მე დარწმუნებული ვარ რომ თქვენ მიიღებთ გადაწყვეტილებას, რომ 225-ე მუხლის დანაშაულს ვერ დაინახავთ,” – განაცხადა ადვოკატმა. (“რადიო თავისუფლება”)

გუჯა ავსაჯანიშვილმა პროკურორ, ვაჟა თოდუას ასანთის კოლოფი აჩვენა და ჰკითხა ეცნობოდა თუ არა ეს ნივთი. პროკურორმა განაცხადა, რომ ეს ის ასანთის კოლოფი იყო, რომელიც ერთ-ერთ სხდომაზე ბრალდებულმა იუმორისტმა, ონისე ცხადაძემ პროკურორების მიმართულებით ისროლა. იგივე თქვა ადვოკატმაც, შემდეგ კი დაინტერესდა, რატომ არ მოხდა რეაგირება დანაშაულზე, რადგან ბრალდებულ რეზო კიკნაძესაც იდენტურ მოქმედებას ედავებიან.

გუჯა ავსაჯანიშვილის განმარტებით, ასანთის კოლოფის სროლაზე გამოძიება არ დაიწყო, რადგან ის პროკურორებს არ მოხვედრია და ნივთის წონა საფრთხის შემცველი არაა. ანალოგიურად საფრთხის შემცველი არაა ქაღალდის ხელსახოცი, რომელიც კიკნაძის საქმის ვიდეოში ჩანს.

მაგრამ იცით, რატომ არ დაიწყეთ გამოძიება? იმიტომ, რომ:

1. ამის წონა საფრთხის შემცველი არაა
2. არ მოგხვედრიათ;
3. საფრთხე არ შეგქმნიათ.

ახლა რევაზ კიკნაძის ვიდეო ავიღოთ – ამ ვიდეოში არის ქაღალდის ხელსახოცი, ქვაც კი არ ჩანს, რაზეც ექსპერტიზა გაქვთ დანიშნული, არ არის პირები, რომლებიც იტყვიან, რომ რევაზ კიკნაძემ შეუქმნა საფრთხე,” – ამბობს გუჯა ავსაჯანიშვილი. (“რადიო თავისუფლება”)

ცნობისთვის, დაკავებულებს – ანდრო ჭიჭინაძეს, ონისე ცხადაძეს, ჯანო არჩაიას, რუსლან სივაკოვს, ლუკა ჯაბუას, გურამ მირცხულავას, ვალერი თეთრაშვილს, გიორგი ტერიშვილს, ირაკლი ქერაშვილს, რევაზ კინაძესა და სერგეი კუხარჩუკს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინათ, რაც ჯგუფურ ძალადობაში მონაწილეობას გულისხმობს.

აღნიშნული დანაშაული სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.