აზერბაიჯანის პრეზიდენტმა, ილჰამ ალიევმა აღნიშნა, რომ საბჭოთა რუსეთის არმია 1920 აზერბაიჯანში შეიჭრა, აზერბაიჯანს სახელმწიფო წაართვა და მისი ოკუპაცია მოახდინა. ამის შესახებ ალიევმა საუდის არაბეთის სახელმწიფო მედიისთვის, Al Arabiya-სთვის მიცემულ ინტერვიუში ილაპარაკა.
“1917 წელს რუსეთის იმპერიის დაშლის შემდეგ აზერბაიჯანის დემოკრატიული რესპუბლიკა დაარსდა. ეს იყო პირველი დემოკრატიული რესპუბლიკა მუსლიმურ სამყაროში, რომელიც 1918 წლის მაისში დაარსდა. მან 1920 წლის აპრილამდე იარსება, როდესაც რუსეთის არმია აზერბაიჯანში შეიჭრა და ქვეყნის ოკუპაცია მოახდინა. ბოლშევიკებმა, რომლებმაც 1917 წელს რევოლუცია მოაწყვეს, ხალხი მოატყუეს. მათი ლოზუნგები იყო: “ქარხნები და საწარმოები – მუშებს, მიწა – გლეხებს, თავისუფლება – ხალხებს”. ჩვენ ჩვენივე სახელმწიფო შევქმენით, მაგრამ ბოლშევიკებმა ჩვენ ის წაგვართვეს. 1920 წლის აპრილში რუსული არმია აზერბაიჯანში შეიჭრა და მისი ოკუპაცია მოახდინა”.- თქვა ალიევმა.
ამავე ინტერვიუში ალიევმა რუსეთსა და აზერბაიჯანს შორის ამჟამინდელ ურთიერთობებზე ილაპარაკა და კვლავ აღნიშნა, რომ აზერბაიჯანი “რუსული შეჭრის პირველი დღიდან უკრაინის ტერიტორიულ მთლიანობას უჭერდა მხარს და განაგრძობს მის მხარდაჭერას”.
“თუნდაც მათ, როგორც ამბობენ, 20 წლის წინ დანაშაული ჩაედინათ, ისინი ხომ ადამიანები არიან. მათთან ასე მოპყრობა არ შეიძლება. ეს რანაირი დამოკიდებულებაა? მათ შორის იყვნენ აზერბაიჯანის მოქალაქეები და აზერბაიჯანული წარმომავლობის რუსეთის მოქალაქეები. ეს იყო უპრეცედენტო აქტი ჩვენი ერის წინააღმდეგ. ჩვენ არ ვაგებთ პასუხს ურთიერთობების გაუარესებისთვის. ჩვენ კონსტრუქციულად და კანონიერად ვპასუხობთ, მაგრამ ჩვენს მიმართ აგრესიის ან უპატივცემულობის არანაირ ნიშანს ან გამოვლინებას არ მოვითმენთ”. – თქვა ალიევმა.
შეგახსენებთ, რომ 28 ივნისს, აზერბაიჯანის საგარეო საქმეთა სამინისტრომ ბაქოში რუსეთის საქმეთა დროებითი რწმუნებული, პიოტრ ვოლოკოვიხი დაიბარა, რომელსაც 27 ივნისის რეიდების დროს ორი აზერბაიჯანელის “ბრუტალური მკვლელობის” გამო მთავრობის პროტესტი გამოუთქვეს. სამინისტროს განცხადებით, რეიდების შედეგად, რამდენიმე ადამიანი მძიმედ დაშავდა.
29 ივნისს, აზერბაიჯანის კულტურის სამინისტრომ რუსული კულტურული ღონისძიებები გააუქმა, მას შემდეგ, რაც რუსეთის ქალაქ ეკატერინბურგში ჩატარებული პოლიციის რეიდების დროს ეთნიკური აზერბაიჯანელების სავარაუდო მკვლელობამ ქვეყნებს შორის დიპლომატიური დაძაბულობა გამოიწვია.
30 ივნისს ბაქოში მდებარე რუსული პროპაგანდისტული მედია Sputnik-ის ოფისში პოლიცია შევიდა. აზერბაიჯანული მედიის ცნობით, ოპერაციის ფარგლებში, სხვადასხვა ბრალდებით, სულ შვიდი ადამიანი დააკავეს. უწყების განცხადებით, სისხლის სამართლის საქმეზე საგამოძიებო მოქმედებები გრძელდება.
მანამდე, აზერბაიჯანში Sputnik-ს, რომელიც რუსეთის სახელმწიფო სააგენტო Russia Today-ს ნაწილია, საქმიანობა ოფიციალურად შეუჩერეს, თუმცა, ადგილობრივი მედიის ცნობით, ოფისი მუშაობას აგრძელებდა და თანამშრომლები კვლავ დადიოდნენ.
მოგვიანებით, მოსკოვსა და ბაქოს შორის მზარდი დიპლომატიური დაძაბულობის ფონზე, ეკატერინბურგში ურალის რეგიონის ადგილობრივი აზერბაიჯანული დიასპორის ხელმძღვანელი, შახინ შიხლინსკი დააკავეს.
შემდგომ 9 ივლისს რუსეთმა მოსკოვის ოლქში აზერბაიჯანული დიასპორის ხელმძღვანელი, ელშან იბრაჰიმოვი ქვეყნიდან გააძევა. ინფორმაციას აზერბაიჯანული მედია ავრცელებს.
აზერბაიჯანის პრეზიდენტმა, ილჰამ ალიევმა Al Arabiya-სთან ინტერვიუში, ასევე თქვა:
რუსეთის მხრიდან აზერბაიჯანული სამოქალაქო თვითმფრინავის ჩამოგდებამ და ამაზე რუსი მაღალჩინოსნების რეაქციამ აზერბაიჯანში ძალზე დიდი გაღიზიანება და იმედგაცრუება გამოიწვია. პირველ რიგში, ეს საერთოდ არც უნდა მომხდარიყო, რადგან როცა რუსულ აეროპორტებზე დრონებით თავდასხმა ხდება, ისინი განსაკუთრებულ რეჟიმს აცხადებენ. რუსულად ამას ковёр-ს ეძახიან და ყველა თვითმფრინავი იღებს სიგნალს, რომ დრონებით თავდასხმაა და უკან ბრუნდებიან.
ავიაკატასტროფამდე ორი კვირით ადრე მსგავსი რამ დაემართა ჩვენს თვითმფრინავს, რომელიც იმავე რუსული ქალაქისკენ მიფრინავდა და სიგნალი მიიღო, რის გამოც უკან გაბრუნდა. მეორეჯერ მათ მსგავსი სიგნალი არ გაუგზავნიათ. სიგნალი მხოლოდ მას შემდეგ გაგზავნეს, როცა თვითმფრინავი უკვე ჩამოგდებული იყო. ეს იმისთვის გააკეთეს, რომ გამომძიებლები შეცდომაში შეეყვანათ. ორჯერ ესროლეს მას [თვითმფრინავს]. მხოლოდ პილოტების პროფესიონალიზმისა და გამბედაობით გახდა შესაძლებელი თვითმფრინავის დაშვება და, საბედნიეროდ, ის ყაზახეთში დაეშვა და არა – რუსეთში.
კომენტარები