აშშ-მ გრენლანდიის თვითგამორკვევის უფლების მხარდაჭერა მას შემდეგ დაადასტურა, რაც ქვეყნის საზოგადოებრივმა მაუწყებელმა გაავრცელა ინფორმაცია, რომ აშშ-ს პრეზიდენტ დონალდ ტრამპთან დაახლოებული სულ მცირე სამი პირი ფარულად გრენლანდიაში გავლენის მოპოვების ოპერაციებს ეწეოდა.
აშშ-ს საქმეთა რწმუნებული მარკ სტრო დანიასა და გრენლანდიის წარმომადგენლებს კოპენჰაგენში ოთხშაბათს შეხვდა. დანიამ ის მას შემდეგ დაიბარა, რაც საზოგადოებრივმა მაუწყებელმა DR-მა გრინლანდიაში აშშ-ს ფარული გავლენების ოპერაციების შესახებ ცნობები გაავრცელა.
აშშ-ის სახელმწიფო დეპარტამენტი შეხვედრის შემდეგ გავრცელებულ განცხადებაში აღნიშნავს, რომ პარტნიორებთან სტრომ “პროდუქტიული საუბარი” გამართა და კიდევ ერთხელ დაადასტურა ვაშინგტონის ერთგულება დანიასა და გრენლანდიასთან მტკიცე ურთიერთობების მიმართ.
“აშშ პატივს სცემს გრენლანდიის ხალხის უფლებას, თავად განსაზღვროს საკუთარი მომავალი” – განაცხადა სახელმწიფო დეპარტამენტმა.
დეპარტამენტმა აღნიშნა, რომ ამერიკის მთავრობა არ აკონტროლებს და არ განსაზღვრავს კერძო მოქალაქეთა ქმედებებს და გავრცელებულ ცნობებზე კომენტარს არ აკეთებს.
ცნობისთვის, ტრამპს არაერთხელ აქვს ნათქვამი, რომ სურს, გრენლანდია აშშ-ს შემადგენლობაში შევიდეს. ამ კუთხით, მას არ გამოურიცხავს დანიის ტერიტორიაზე სამხედრო ძალის გამოყენებაც.
კომენტარები