“რატომ არის ოცნება მოწყვლადი და რატომ ელის მძიმე შემოდგომა?” – თავდგირიძე

საზოგადოებრივი მოძრაობა “ფარის“ თანადამფუძნებელი, პოლკოვნიკი გიორგი თავდგირიძე:

რატომ არის ოცნება მოწყვლადი და რატომ ელის მძიმე შემოდგომა?
ოცნების რეჟიმი დგას ინერციაზე და ქართულ პოლიციის ძალისმიერ შესაძლებლობაზე. ინერცია – 2020 წლამდე ოცნება როგორც პოლიტიკური ძალა მოქმედებდა. პრორუსული, მოუქნელი, უუნარო, მაგრამ მოქმედებდა არსებული პოლიტიკური წესებით და ინსტრუმენტებით. 2020-24 წლებში დაიწყო მისი ფორმირება, როგორც რუსული პროქსი ძალა. 2024 წელს გააყალბა არჩევნები და მიიტაცა ხელისუფლება, ჩამოიხსნა ნიღაბი და დაიწყო რუსულ რეჟიმად ფორმირება. ჰიბრიდული ოპერაციის ფარგლებში შენიღბული ქმედებები აძნელებს, ქვეყნის შიგნით არსებული ინსტრუმენტებით, სახელმწიფო გადატრიალების დადგენას და იურიდიულად შეფასებას ( თუმცა ეს მოხდება რეჟიმის დემონტაჟის შემდეგ ). ამიტომ, ოცნება აგრძელებს მოღვაწეობას როგორც დე ფაქტო ლეგიტიმაციის მქონე მართველი ძალა. მისი პრორუსული საქმიანობის ძირითადი ნაწილი ჩრდილშია და ოფიციალური გამოძიების გარეშე ძნელია მათი იურიდიული შეფასება ( ჰიბრიდული ბურუსით ინიღბება ). ამიტომ სახელმწიფო აპარატზე კონტროლი ინერციით გრძელდება და როგორც ინერციის ბუნებიდან გამომდინარეობს, დროთა განმავლობაში მცირდება.
მხოლოდ ეს ინერცია აძლევს ოცნების რუსულ რეჟიმს შეინარჩუნოს პოლიცია, როგორც თავისი დასაყრდენი და მოსახლეობაზე ფიზიკური ძალადობის ინსტრუმენტი.
რატომ მხოლოდ ქართული პოლიცია?
ოცნებამ ვერ მოასწრო თავისი პარტიული გასამხედროებული დაჯგუფების შექმნა. ჯარის ტრანსფორმაცია კოლოსალური თანხები დაჯდებოდა და დროში ძალიან გაწელილია ( თუმცა შემოიტანა სავალდებულო სამსახურის ახალი ინსტრუმენტები და როცა დაჭირდება აამოქმედებს ). ზონდერების მომზადება ჩაუვარდა, ღარიბაშვილს ჰქონდა მცდელობა, მაგრამ მის დასრულებასთან ერთად ეს პროექტი მხოლოდ ფულის საჭრელ აქტიურობად იქცა. პოლიციაში კი ხარებას პროექტი ჰქონდათ და მისი რებრენდინგი ჯერ არ დაუწყიათ. რატომ იგვიანებენ ინფორმაცია არ არის. შესაბამისად ძალოვანი მხარდაჭერა ჩამოეკიდა ოფიციალურ პოლიციურ სტრუქტურებს. ეს არის რეალობა.
პოლიცია კავკასიურ ცარცის წრეშია, მას შინაგანი ბრძოლა აქვს, ერთის მხრივ მას არ სურს უკანონო ბრძანებების შესრულება, მაგრამ მეორეს მხრივ აქვს მართველი გუნდისადმი უპირობო მორჩილების ინსტინქტი ( ჩვევა, ტრადიცია ). აქვე დავამატებ, რომელი მხარეს იქნება პოლიცია გადახრილი დამოკიდებულია ოცნების საპირწონე სიმძიმის ცენტრის ავტორიტეტზე დამოკიდებული, ჯერ ივანიშვილის ავტორიტეტი ჯაბნის.
ოცნების ძალისმიერი მხარდაჭერისთვის რუსეთს არც საშუალება გააჩნია და ვითარებასაც სწორად აფასებენ. საქართველოში რუსეთისათვის ომი ისეთივე რთული იქნება როგორც უკრაინაში. ოპერატიული თვალსაზრისით უკრაინის სიმძიმეს დიდი სივრცეები განსაზღვრავს, საქართველოში კი რთული რელიეფი. თუ ოპერატიულ სიმძიმეს ჩავუღრმავდებით, უკრაინაში უფრო რთულია სამხედრო ოპერაცია თუ საქართველოში გადაჭრით ვერ იტყვი. ასევე შემაკავებელი ფაქტორებია კავკასია, თურქეთი და აზერბაიჯანი. ამიტომ, ოცნების დასაყრდენი საქართველოში მხოლოდ გაორებული პოლიციაა.
რაც არ უნდა არ მოგვწონდეს დღეს პოლიციის საქმიანობა და რაც არ უნდა გაბრაზებული ვიყოთ პოლიციელებზე, დარწმუნებით შემიძლია ვთქვა, ქართული პოლიცია საქართველოს მოსახლეობის წინააღმდეგ არ იომებს. რაც შეეხება ინერციას, ოცნებისთვის სამწუხაროდ, ყველა ინერცია მოკლე დროში სრულდება.
თუ ყველაფერ ამას შევაჯამებთ, აღმოვაჩენთ, რომ ტყუილად ველოდებით სანქციების ეფექტს ( მათ უკვე აქვთ ძალიან მნიშვნელოვანი ეფექტი ), ძალა ჩვენშია, ცვლილებები ჩვენც ხელგვეწიფება, შემოდგომა მძიმე იქნება, მაგრამ არა ჩვენთვის, იმიტომ რომ ძალაც ჩვენშია და ენერგიაც.
პ.ს. 25 ივლისიდან ნატო ბრუნდება საქართველოში, აშშ-ის და ნატოს სხვა ქვეყნების სამხედროები ჩამოდიან სამხედრო სწავლებაზე. ეს იქნება ძალიან დიდი მუხტი ქართველ პატრიოტებისთვის. ჩვენ მარტო არ ვართ.