ვინ არის მილიარდერი სამველ კარაპეტიანი, რომელიც სომხეთში დააკავეს სახელმწიფო გადატრიალების მცდელობისთვის? – ზურაბ ბატიაშვილი

ანალიტიკოსი, ზურაბ ბატიაშვილი:

კარაპეტიანი არის რუსეთის მოქალაქე ოლიგარქი (Forbes მონაცემებით, 2021 წელს მისი ქონება 5 მლრდ აშშ დოლარს შეადგენდა), რომელიც სომხეთში ფლობს დიდ ბიზნესებს (მაგალითად ელექტროგამანაწილებელ კომპანიას) და ეწევა “ქველმოქმედებას”. მაგალითად, აფინანსებს ეკლესია-მონასტრებს (მაგალითად დააფინანსა ცნობილი ეჩმიაძინის საკათედრო ტაძრის რესტავრაცია) და სამღვდელოებას.

კარაპეტიანმა ფაშინიან-ეკლესიას შორის დაპირისპირებაში სამღვდელოებსს დაუჭირა მხარი და ხელისუფლების ჩამოგდების მოწოდება გააკეთა, რის გამოც იგი მალევე დააკავეს.

ცხადია, კარაპეტიანის დაკავებას რუსეთი გამოესარჩლა. ანტისომხურ ისტერიკაში ჩაერთნენ ისეთი ცნობილი ფიგურები, როგორებიც არიან პესკოვი, ზახაროვა, სომონიანი, სოლოვიოვი და ა.შ. და ეს ბუნებრივიცაა, რადგან კარაპეტიანი სომხეთის ახლანდელ ხელისუფლებას მკაცრად აკრიტიკებდა რუსეთიდან დისტანცირების გამო. ლარსზე პრობლემები შეექმნა რუსეთისკენ მიმავალ სომხურ სატვირთო მანქანებს და ა.შ.

ამის მიუხედავად, ფაშინიანმა უკან არ დაიხია და საზოგადოების დიდი ნაწილის კონსოლიდირება მოახდინა იმ იდეამ, რომ არავის უნდა ჰქონდეს უფლება რუსეთიდან ჩაერიონ სომხეთის შიდა საქმეებში (კარაპეტიანს არ აქვს სომხეთის მოქალაქეობა). რუსებს ისიც აღიზიანებთ, რომ მაგალითად ფაშინიანმა თურქეთთან დაახლოებაც დაიწყო და სულ ახლახანს პირველი ოფიციალური ვიზიტითაც იმყოფებოდა იქ.

სომხეთში ბევრი პარალელს ავლებს საქართველოსთან და კარაპეტიანს “ივანიშვილი 2.0”-ადაც მოიხსენიებენ. რუსები კაპარეტიანს მომავალ წელს დაგეგმილი სომხეთის საპარლემენტო არჩევნებისთვის ამზადებდნენ. მაგრამ ფაშინიანმა დაასწრო მოქმედება. სომხებს არ სურთ ამ გზის გამეორება, რასაც საქართველო გადის. არ სურთ იქ დაბრუნება, სადაც თავად უკვე იყვნენ და საიდანაც კარგი არაფერი ახსოვთ.

რა თქმა უნდა, სცენარი ერთიდაიგივეა. მეტი საქმე არ აქვთ რუსეთის სპეცსამსახურებს, რამე ორიგინალური მოიფიქრონ რომელიმე ქვეყნისთვის. სცენარში მხოლოდ ქვეყნებისა და მოქმედი პირების სახელები იცვლება, დანარჩენი ყველაფერი ერთიდაიგივეა.

ბრძოლა სომხეთში კი გრძელდება. კარაპეტიანს სომხეთის პრორუსული სამღვდელოებაც ესარჩლება. ამიტომ ბოლო პეროიდში სულ უფრო ხშირად ჩნდება ინფორმაციები ფაშინიანსა და სამღვდელოებას შორის მზარდი დაპირიპირების შესახებ.