მხედრული ვალი, მხედრული მამაცობა – რისთვის დააჯილდოვა ყაველაშვილმა ანზორ ჩუბინიძე და მისი უწყების თანამშრომლები

მიხეილ ყაველაშვილმა სახელმწიფო დაცვის სპეციალური სამსახურის ხელმძღვანელი, ანზორ ჩუბინიძე ღირსების ორდენით დააჯილდოვა და მედალი სახელმწიფო დაცვის სპეციალური სამსახურის 31 წლის იუბილესადმი მიძღვნილ ღონისძიებაზე გადასცა.

მიხეილ ყაველაშვილი სოციალურ ქსელში წერს:

ქვეყნის უსაფრთხოების სადარაჯოზე დგომისათვის, განსაკუთრებული მადლობა გადავუხადე უწყების ხელმძღვანელობას, პირად შემადგენლობას, თანამშრომლებსა და ვეტერანებს.

სიტყვით გამოსვლისას აღვნიშნე, რომ ფასდაუდებელია სახელმწიფო დაცვის სპეციალური სამსახურის როლი სახელმწიფო სისტემის სტაბილური და უსაფრთხო ფუნქციონირების საქმეში.

ღონისძიებაზე, კანონიერებისა და მართლწესრიგის განმტკიცებაში შეტანილი განსაკუთრებული წვლილისათვის ღირსების ორდენით დავაჯილდოვე სახელმწიფო დაცვის სპეციალური სამსახურის უფროსი ანზორ ჩუბინიძე. სახელმწიფოს ღირსეული სამსახურისათვის საქართველოს სახელმწიფო ჯილდო -„ღირსების მედალი“ უწყების 4 თანამშრომელს, ხოლო მხედრული ვალის შესრულებისათვის, ვაჟკაცობისა და გაბედულებისათვის, საქართველოს სახელმწიფო ჯილდო – მედალი „მხედრული მამაცობისთვის“ უწყების 5 თანამშრომელს გადავეცი.

ღონისძიების ფარგლებში უწყების ინფრასტრუქტურა დავათვალიერე. დავესწარი დასაცავ პირზე შენობაში თავდასხმისა და ევაკუაციის, ასევე კორტეჟზე თავდასხმა-მოგერიებისა და კინოლოგების საჩვენებელ იმიტაციას.” – წერს მიხეილ ყაველაშვილი.