მანამდე 19 ივნისს ოთხმა მაღაროელმა შიმშილობა დაიწყო ჭიათურის პროტესტის დაკავებული ლიდერების – მერაბ სარალიძის, გიორგი ნეფარიძის, აჩიკო ჭუმბურიძისა და თენგო გველესიანის გათავისუფლებამდე.
როგორც ჯგუფში ” მაღაროელი” წერენ, მერაბ სარალიძემაც დაიწყო შიმშილობა ციხეში პროტესტის ნიშნად.
“ჩვენ, ვინც ამდენ ხანს ვიბრძოდით სამართლისთვის, მივატოვა ხელისუფლებამ, იმ სახელმწიფომ, რომლის ინტერესების დაცვასაც ვცდილობდით იმ საზოგადოებამ რომლის ინტერესებსაც ვაჟღერებდით ვაჟღერებთ და გავაჟღერებთ, მაგრამ ჩვენი რწმენა რჩება – საქართველოში, ღვთისმშობლის კურთხეულ მიწაზე, უსამართლობას ადგილი არ უნდა ჰქონდეს”, – წერენ ჯგუფში “მაღაროელი”.
ჭიათურის პროტესტის ლიდერები სისხლის სამართლის წესით 29 აპრილს დააკავეს და მათ ჯანმრთელობის განზრახ ნაკლებად მძიმე დაზიანებას ედავებოდნენ. შემდგომში, 30 აპრილს, პროკურატურამ მათ ბრალი დაუმძიმა.
ორ მათგანს, მერაბ სარალიძესა და გიორგი ნეფარიძეს, ჯგუფური ძალადობის ორგანიზებასა და მასში მონაწილეობას ედავებიან. დანარჩენ ორს, აჩიკო ჭუმბურიძესა და თენგო გველესიანს, რომელთა უფლებებს კერძო ადვოკატები იცავენ, მხოლოდ ჯგუფურ დანაშაულში მონაწილეობა ედებათ ბრალად.
2025 წლის იანვარში კომპანია „ჯორჯიან მანგანეზმა“, რომლის მფლობელობაშია ყველა მაღარო ჭიათურაში, მუშაობა დროებით შეაჩერა და თანამშრომლები ნაწილობრივ ანაზღაურებაზე გადაიყვანა. თუმცა მაღაროელები ამ ხელფასსაც ვერ იღებენ – 60%-იან ანაზღაურებას, რისი გადახდის ვალდებულებაც კომპანიას დაეკისრა მუშაობის პროცესის შეჩერების შემდეგ. მაღაროელების ინფორმაციით, საქმე ეხება 5000 თანამშრომელს, რომელთაგან 3000-ზე მეტი ჭიათურაში მუშაობს.
28 თებერვლიდან ჭიათურაში უწყვეტი საპროტესტო აქციები იმართება.
7 მარტს „ჭიათურა მენეჯმენტ კომპანიმ“ „ჯორჯიან მანგანეზთან“ შეთანხმებით განცხადება გაავრცელა, სადაც ნათქვამია, რომ ჭიათურაში მიწისქვეშა სამუშაოები აღარ განახლდება. შპს „ჭიათურა მენეჯმენტ კომპანიმ“, რომელიც ჭიათურაში მიწისქვეშა და ღია კარიერული წესით მანგანუმს მოიპოვებს, თბილისის საქალაქო სასამართლოს გაკოტრების განცხადებით მიმართა.
23 აპრილს „ჯორჯიან მანგანეზის“ მმართველი კომპანიის, CMC-ის განცხადებით, ჭიათურაში სამთო წარმოების აღდგენა და რეორგანიზაცია დაიგეგმა, რომელსაც რუსეთის მოქალაქე მიხეილ სოცკი უხელმძღვანელებს. კომპანიამ გადაჭრით მოითხოვა პროტესტის, პიკეტირების შეწყვეტა და მის ხედვაზე დამორჩილება.
ამის შემდეგ 24 აპრილს მაღაროელებმა დამსაქმებლისგან მიიღეს ერთგვარი შეთავაზება, რომელიც ეხება კომპანია “ჯორჯიან მანგანეზში” რეორგანიზაციის პროცესსა და მუშაობის შემდგომი გაგრძელების პერსპექტივებს. ერთგვერდიანი დოკუმენტი სულ 7 პუნქტისგან შედგება.
დოკუმენტში წერია, რომ დასაქმებულები ინფორმირებულეი არიან რეორგანიზაციის შემდეგ არსებული საშტატო ნუსხის, ვაკანტური ადგილების, სამუშაო განაკვეთის, ანაზღაურებისა და სხვა დეტალების შესახებ და ზოგადად, აქვთ პასუხები მათთვის საინტერესო ყველა კითხვაზე. თუმცა მაღაროელები ამბობენ, რომ გარდა შაბლონური განცხადებისა, რომელზე ხელმოწერისკენაც მოუწოდებენ, არანაირი განმარტებები არ მიუღიათ.
გარდა ამისა, მათ მიიღეს სატელეფონო შეტყობინებები, რომლის მიხედვითაც, თუ თავად არ გამოცხადდებიან ხელშეკრულებაზე ხელმოსაწერად, კომპანიის წარმომადგენლები პირადად მიაკითხავენ მათ.
ჭიათურელებს რამდენიმე მსხვილი მოთხოვნა აქვთ, რაც, მათივე თქმით, შემდგომ დეტალურ განხილვას და დაზუსტებას საჭიროებს:
- შეხვდნენ ადგილობრივი და ცენტრალური ხელისუფლების წარმომადგენლები;
- გავიდეს ინვესტორი და სახელმწიფომ გადაიბაროს ჭიათურაში პასუხისმგებლობა სამთო წარმოებაზე;
- როდესაც აღდგება მუშაობა, მადნის ექსპორტიდან შემოსული თანხის 5% ჩაირიცხოს ფონდში, რომელიც ჭიათურელი ბავშვებისა და მოზარდებისთვის იქნება განკუთვნილი;
- ჭიათურასა და მუნიციპალიტეტის სოფლებს შორის დაინიშნოს უფასო ტრანსპორტი;
- მიეხედოს ქალაქის ეკოლოგიას, განსაკუთრებით ღია კარიერულ მოპოვებას;
- გაიყინოს ბანკის სესხები მუშაობის აღდგენამდე.
კომენტარები