ნინო დათაშვილი დიღმის წინასწარი მოთავსების იზოლატორში იმყოფება – დაკავებული მასწავლებელი სასამართლოში ეტაპირებას ელოდება, რათა მოსამართლემ მის აღკვეთ ღონისძიებაზე იმსჯელოს. ნინო დათაშვილის უფლებადამცველი შუამდგომლობის დაყენებას გეგმავს იმის თაობაზე, რომ სამოქალაქო აქტივისტს აღკვეთი ღონისძიების მკაცრი სახე არ შეუფარდონ.
ნინო დათაშვილის ადვოკატი ამბობს, რომ მასწავლებლის დაპატიმრების განჩინება მოსამართლე თეონა ეპიტაშვილმა 19 ივნისს გამოსცა. არადა, ამ დროისთვის ნინო დათაშვილს 112-ში შეტყობინება ჰქონდა დატოვებული, რომ მანდატურის სამსახურის წარმომადგენლებმა მასზე იძალადეს. თუმცა, ადვოკატის განმარტებით, მოსამართლე ეპიტაშვილმა ეს გარემოება არ გაითვალისწინა და ნინო დათაშვილს ხელბორკილები გამოკითხვაზე დაბარების გარეშე დაადეს.
სასამართლოსთვის მიმართული ჰქონდა პროკურატურას ნინოს დაკავების შესახებ ისე, რომ არ ყოფილა მასთან გასაუბრების მცდელობა, არ ყოფილა მისი მოსმენის ინტერესი. ამავე მტკიცებულებებში, საქმის მასალებში მითითებულია, რომ ნინოს მიმართული აქვს 112-ისთვის და გაცხადებული აქვს მის წინააღმდეგ ძალადობის შესახებ. ასევე ნინო “ტვ პირველთან” ინტერვიუში ამბობს, რომ მასზე იძალადეს მანდატურის თანამშრომლებმა და ეს მტკიცებულებები საქმეშია, მაგრამ ამის მიუხედავად, პროკურატურამ ამ ეტაპამდე არ ჩათვალა საჭიროდ, რომ ნინოსთვის მოესმინათ. არც ყოფილა მცდელობა, რომ მოესმინათ მისთვის, დაერეკათ მისთვის, ან მიეწვიათ, დაებარებინათ პოლიციაში.
ამის მიუხედავად, შუამდგომლობაში მითითებული იყო, რომ ნინო გააგრძელებდა დანაშაულებრივ საქმიანობას და მიემალებოდა გამოძიებას, რაც არის აბსურდი. არანაირი ფაქტობრივი გარემოებებიდან არ გამომდინარეობს აღნიშნული. დაკავების განჩინება მიღებულია 19 ივნისს, მოსამართლე თეონა ეპიტაშვილის მიერ. განჩინებაში გადატანილია პროკურატურის მიერ მოყვანილი არგუმენტები და გარემოებები, რომლებიც ვერ გაუძლებს ელემენტარულ სამართლებრივ კრიტიკას”. – განაცხადა ადვოკატმა.
აქტივისტი ნინო დათაშვილი, რომელზეც რამდენიმე დღის წინ შსს-მ სისხლის სამართლის საქმე აღძრა, 20 ივნისს დააკავეს. აქტივისტსა და მასწავლებელს სისხლის სამართლის კოდექსის 353-ე მუხლის მე-3 ნაწილის დარღვევას ედავებიან, რაც საზოგადოებრივი წესრიგის დამცველის ან ხელისუფლების სხვა წარმომადგენლის მიმართ წინააღმდეგობას, მუქარასა და ძალადობას გულისხმობს. დანაშაული 4-დან 7 წლამდე ვადით თავისუფლების აღკვეთას ითვალისწინებს.
კომენტარები