რუსული ჯაშუშური ქსელი, ქართველი ხელმძღვანელით – რას წერს მედია არგენტინის დაზვერვის სპეცოპერაციაზე

არგენტინის დაზვერვამ რუსი რეზიდენტების ჯგუფი გამოავლინა ქართული გვარის მქონე ხელმძღვანელით – უცხოური მედიასაშუალების ინფორმაციით, გამოვლენილი არიან არგენტინაში რუსეთის სასარგებლო დეზინფორმაციის კამპანიებში მონაწილეთა ქსელში ეჭვმიტანილები.

როგორც ქვეყნის პრეზიდენტის პრესმდივანმა მანუელ ადორნიმ განაცხადა, ეჭვმიტანილები სავარაუდოდ, ეწეოდნენ საეჭვო საქმიანობას რუსეთის გეოპოლიტიკური მიზნების სასარგებლოდ და მჭიდრო კონტაქტში იმყოფებოდნენ არგენტინის მოქალაქეებთან.

მისი თქმით, რუსების ამოცანებში შედიოდა კონტენტის შექმნა და გავრცელება სოციალურ ქსელებში, ზემოქმედება ადგილობრივ არასამთავრობო ორგანიზაციებზე, ფოკუს-ჯგუფების ჩატარება და პოლიტიკური ინფორმაციის შეგროვება, რომელიც „შეიძლება გამოყენებულ იქნას რუსეთის ინტერესებისთვის.“ ისინი ცდილობდნენ გავლენის მოპოვებას ადგილობრივ ორგანიზაციებზე და გავრცელებული ინფორმაციით, პირდაპირ იღებდნენ დაფინანსებას რუსეთიდან.

მედიის ცნობითვე, ადორნიმ დაასახელა ორი მათგანის სახელი — ლევ ანდრიაშვილი, რომელიც, როგორც მან თქვა, ხელმძღვანელობდა ქსელს და აგრეთვე იყო პასუხისმგებელი „დაფინანსებაზე და კავშირების დამყარებაზე ადგილობრივ აგენტებთან,“ და მისი მეუღლე ირინა იაკოვენკო.

ადორნიმ არ დააზუსტა, რა სტატუსში იმყოფებიან ეს პირები — დაკავებული არიან თუ ისევ არგენტინაში რჩებიან.

ბუენოს-აირესში რუსეთის საელჩომ განაცხადა, რომ ანდრიაშვილი და იაკოვენკო არ იმყოფებიან საკონსულო აღრიცხვაზე და აღნიშნა, რომ არგენტინის საგარეო საქმეთა სამინისტროში გაგზავნა ნოტა მათ იურიდიულ სტატუსთან დაკავშირებით განმარტების მოთხოვნით.