ამერიკის შეერთებული შტატების სახელმწიფო დეპარტამენტი რობინ დანიგანის მიერ თანამდებობის დატოვებასთან დაკავშირებით globalnews.ge-ს წერილობით პასუხს უბრუნებს.
კითხვაზე, “როგორია თქვენი პოზიცია საქართველოში ელჩის გადადგომასთან დაკავშირებით და ქართველ ხალხს უნდა ჰქონდეს მოლოდინი, რომ საქართველოს მიმართ თქვენი პოლიტიკა შეიცვლება?”, სახელმწიფო დეპარტამენტის პრესსამსახური პასუხობს:
“მადლობას ვუხდით ელჩ დანიგანს 33 წლის განმავლობაში შეერთებული შტატების გამორჩეული სამსახურისთვის. მას ჩვენი სრული მხარდაჭერა აქვს თანამდებობის დატოვებამდე. ჩვენ განვაგრძობთ საქართველოსადმი ჩვენი მიდგომის შეფასებას ამერიკული ინტერესების წინსვლისთვის.
შეერთებულმა შტატებმა ნათლად აჩვენა, თუ რა ნაბიჯების გადადგმა შეუძლია საქართველოს მთავრობას, რათა დაამტკიცოს, რომ იგი სერიოზულადაა განწყობილი შეერთებულ შტატებთან ურთიერთობის გაუმჯობესების კუთხით”, – ნათქვამია სახელმწიფო დეპარტამენტის სპიკერის, ტემი ბრუსის ხელმოწერით მიღებულ წერილში.
აშშ-ს ელჩი საქართველოში, რობინ დანიგანი პოზიციას ტოვებს. საელჩოს მიერ გავრცელებულ განცხადებაში დიპლომატი წერს, რომ პირადი გადაწყვეტილებით, პენსიაზე გადის. რობინ დანიგანის განცხადებით, მისი გაწვევა აშშ-ის მთავრობას არ მოუთხოვია. აშშ-ის მოქმედი ელჩი აღნიშნავს, რომ საქართველოში დიპლომატიურ სამსახურს ივლისში დაასრულებს.
კომენტარები