კონკურენციის სააგენტომ „რუსთავის ავტობაზრობა“ დომინანტური მდგომარეობის ბოროტად გამოყენების გამო 848 276 ლარით დააჯარიმა. გადაწყვეტილება 14 მაისით არის დათარიღებული, თუმცა სააგენტომ ინფორმაცია დღეს, 23 მაისს, გაავრცელა.
მოკვლევით კონკურენციის სააგენტომ დაადგინა, რომ 2023 წელს რუსთავის ავტობაზრობაზე დაჯარიმებული კომპანიები (ტერიტორიის მფლობელი შპს „მიკადო ჯორჯია“ და მისი მოიჯარე შპს „რუსთავის ავტობაზრობა“, რომლებსაც ერთი მფლობელი ჰყავდათ) არასამართლიანად მაღალი ფასებით ოპერირებდნენ. საკვლევ პერიოდში კლიენტებისთვის იჯარის ფასი ორჯერ და მეტად გაიზარდა.
„აღნიშნული ქმედება სააგენტოს მიერ შეფასდა, როგორც დომინანტური მდგომარეობის ბოროტად გამოყენება, რაც არასამართლიანად მაღალი ფასის დაწესებაში გამოიხატა“, – წერია პრესსამსახურის გავრცელებულ ცნობაში.
„რუსთავის ბაზრობას“ 200-ზე მეტმა ავტოიმპორტიორმა 2023 წლის ნოემბერში უჩივლა. იმპორტიორები მიიჩნევდნენ, რომ ბაზრობის ადმინისტრაცია იყენებდა ბაზარზე დომინანტურ მდგომარეობას და მოითხოვენ გადასახადების შემცირებას.
ისინი ამბობდნენ, რომ ავტომობილებით მოვაჭრეები „რუსთავის ბაზრობას“ რამდენიმე გადასახადს უხდიდნენ:
- საბაჟო ტერმინალამდე – ორი თვე უფასოა, შემდეგ ერთი თვის განმავლობაში კი დღეში 10 ლარი;
- საბაჟო ტერმინალში, სადაც ბაზრის ადმინისტრაციამ გადასახადი 15 ლარიდან 10 ლარამდე შეამცირა;
- ავტოსადგომზე, სადაც გადასახადი 7 ლარიდან 10 ლარამდე გაიზარდა.
საქართველოში რამდენიმე ავტობაზრობაა, თუმცა მათ შორის დომინანტური მდგომარეობა „რუსთავის ავტობაზრობას“ აქვს.
კომენტარები