“ბექა ონიანი ახლა კომაშია და სიკვდილს ებრძვის – მის ამ მდგომარეობაში მიმყვანს 4- 7 წლამდე პატიმრობა ემუქრება, ზუსტად იმდენი, რამდენიც მზია ამაღლობელს,“- ამის შესახებ სოციალურ ქსელში სამართლის დოქტორი, პროფესორი კახა ურიადმყოფელი წერს.
ურიადმყოფელის ინფორმაციით, თავდამსხმელის სახელი თავიდანვე იცოდა გამოძიებამ, თუმცა აღმოჩნდა, რომ ის პოლიციელის შვილია და მხოლოდ მას შემდეგ დააკავეს, რაც ოჯახმა მედიას სთხოვა დახმარება.
არ ვიცი რა შეიძლება იყოს ადამიანობის იმაზე დიდი საზომი, ვიდრე ემპათიისა და სამართლიანობის განცდა
დღეს ვიგებთ, რომ ბექა ონიანის სიკვდილამდე მიმყვანს 4-დან 7 წლამდე პატიმრობა ემუქრება. ზუსტად იმდენი, რამდენიც მზია ამაღლობელს.
ივა ტყეშელაშვილი ჩუმად ჩაუსაფრდა ბექას, თავში გამეტებით ურტყა, წაქცეულზე, სავარაუდოდ, ზემოდანაც იხტუნავა და გათიშული პარკინგზე მიატოვა. მიზეზი – ფეხბურთის თამაშის დროს რაღაც არ მოეწონა…
თავდამსხმელის სახელი თავიდანვე იცოდა გამოძიებამ, თუმცა აღმოჩნდა, რომ ის პოლიციელის შვილია და მსგავსი ინციდენტებიც მისთვის უცხო არ ყოფილა. მხოლოდ მას შემდეგ დააკავეს ტყეშელაშვილი, რაც ოჯახმა მედიას სთხოვა დახმარება და ბექას ამბავზე ყველამ დაიწყო საუბარი.
ძალიან მეფიქრება და მაშინებს – როგორ შეგიძლია შენ, ამ ქვეყნის შვილს – უკანასკნელი სიტყვებით ლანძღო მზია ამაღლობელი, უწოდო მას ქვეყნის მტერი და უსურვო ციხეში ამოლპობა… ხოლო ბექას მსგავს ტრაგედიებზე ოდნავაც არ გქონდეს რეაქცია. და საერთოდაც, როგორ შეგიძლია ასეთ ყოველდღიურობას ეძახდე მშვიდობას, ღირსებასა და კეთილდღეობას…
ბექა ახლა კომაშია და სიკვდილს ებრძვის. შენ კი შეგიძლია საკუთარ სინდისს შეებრძოლო და ბოლოსდაბოლოს გადაწყვიტო – გაქვს თუ არა შერჩენილი სულ მცირედი ემპათიისა და სამართლიანობის განცდა მაინც და საერთოდ – ხარ თუ არა ადამიანი…
პ.ს. უნიჭიერესო, ულაღესო და უკარგესო ბექა, უნდა გაუძლო. უამრავი სასარგებლო საქმე გაქვს წინ კიდევ გასაკეთებელი. ყველაფერი კარგად იქნება“ – წერს კახა ურიადმყოფელი.(ტვპირველი)
კომენტარები