საქართველომ ბელარუსისა და რუსეთის მოქალაქეებისთვის, აკრძალული საქონლის – სპეცტექნიკისა და ავტომობილების რეექსპორტი შეწყვიტა. ინფორმაცია რუსულ მედიაში ვრცელდება. BM.GE აღნიშნულ საკითხზე ცდილობს შემოსავლების სამსახურიდან ოფიციალური პასუხი მიიღო.
რუსული მედიაში გავრცელებული ინფორმაციით, ახლა საქართველო არამხოლოდ მსუბუქი ავტომობილების, არამედ სპეცტექნიკის რეექსპორტსაც წყვეტს. რუსული მედია წერს, რომ „შავი ხვრელი“ ქართულმა მხარემ გამოცემა iFact-ის მასალის გამოქვეყნების შემდეგ ამოქოლა, რომელშიც საუბარია, რომ საქართველო „საქართველოს საზღვრები სანქციების გვერდის ასავლელი “მწვანე დერეფანია”. საგამოძიებო მასალის ავტორები, სტატიაში საუბრობენ იმაზე თუ როგორ დაუძვრა რუსეთი კიდევ ერთ სანქციას და შეუფერხებლად იმარაგებს ბულდოზერებს, ექსკავატორებს, გრეიდერებს, ტრაქტორებს, ამწეებს თუ თოვლმავლებს, რომლის მიწოდებაც ევროკავშირმა რუსეთისთვის შეზღუდა. მათივე ცნობით, 2022 წლიდან 2025 წლის აპრილის ჩათვლით საქართველოდან სომხეთში,აზერბაიჯანსა და ცენტრალური აზიის ქვეყნების 2 500 ერთეული მძიმე ტექნიკა გადაიზიდა. აღინიშნება, რომ ტექნიკა საქართველოდან ფორმალურად მესამე ქვეყნებში გადაიზიდება, თუმცა ადგილამდე არ ჩადის და რუსეთში ხვდება. წერია მასალაში.
რუსული მედიის ინფორმაციით, ამ აკრძალული ტექნიკის რეექსპორტისთვის ყაზახეთის ან ყირგიზეთის მოქალაქეებზე გაფორმებაა საჭირო. ერთ-ერთი გამოცემა სატრანსპორტო – ლოგისტიკურ კომპანია VIG trans-ზე დაყრდნობით წერს, რომ ამ დროისთვის ტექნიკის გაფორმება ჯერჯერობით მხოლოდ გაძვირდება, რადგან რეექსპორტირებული საქონელი რუსეთისა და ბელარუსის მოქალაქეებზე კი არა, სხვა ქვეყნების მოქალაქეებზე უნდა გაფორმდეს.
კომპანიის დამფუძნებელი იგორ რებელსკი აცხადებს:
„ეს ისტორია ასე თუ ისე ჩერდებოდა, მაგრამ ინსტრუმენტი მუშაობდა, ახლა კი ევროკავშირიდან დამატებითი სანქციების მოლოდინში, ვხედავთ გარკვეულ ჩანაფიქრებს ევროკავშირის მხრიდან იმის შესახებ, რომ რუსეთში ამ საქონლის მიწოდება საბოლოოდ შეიზღუდოს. ახლა ისინი ჰიპერსანქციების ამოქმედებას განიხილავენ და შესაძლებელია, რომ საქართველო ამ მხრივ თავის ლოიალობას აჩვენებს. როგორ იმუშავებს ეს პრაქტიკაში, ჯერ გაურკვეველია, ანუ ჩვენ იმპორტიორებისა და ბაზრისგან უკუკავშირს ვერ ვხედავთ. ვიღაც ალბათ იყენებს ამ მექანიზმს, ვიღაც – არა. ჩვენ ხომ ლოგისტიკური კომპანია ვართ და ჩვენ ეს გამოცდილება არ გვქონია“, – აცხადებს კომპანიის ხელმძღვანელი რუსულ მედიასთან.
ამასთან კითხვაზე – შესაძლებელია თუ არა რეექსპორტის მიზნით სპეცტექნიკის ყირგიზებზე ან ყაზახებზე გადაფორმება, VIG trans-ის ხელმძღვანელი პასუხობს: „დე იურე ეს შესაძლებელია, საკანონმდებლო შეზღუდვები არ არსებობს, თუმცა ადამიანები პრობლემებს ყოველთვის აწყდებიან. მგონია, რომ ეს არასისტემატიზებული ამბავია, ალბათ ერთეული შემთხვევები იქნება, თუმცა ეს არ ნიშნავს იმას რომ ასეთი ფაქტების მუდმივ ბიზნეს – ქეისად გამოყენება შეიძლება. მუდმივი კონტროლის დროს თუ ყველაფერს შევამოწმებთ, ეს ხომ ყოველთვის ჩანს – რა კომპანიაა, ფული საიდან მოძრაობს, სად იყიდება, ეს უბრალოდ დროის საკითხი იქნება.
კომენტარები