პოლიციელი, რომელიც პროკურატურამ სინდისის პატიმრების – ზვიად ცეცხლაძის, ვეფხია კასრაძის, ირაკლი მიმინოშვილის, ვასილ კაძელაშვილის, გიორგი გორგაძის, ინსაფ ალიევის, თორნიკე გოშაძის და ნიკოლოზ ჯავახიშვილის წინააღმდეგ მთავარ მოწმედ მიიყვანა, არ ამბობს, რომელ დეპარტამენტში მუშაობს, არის თუ არა “ხარებას” დანაყოფის წევრი და უშუალოდ ვისგან მიიღო დავალება, ჭიჭნაძის ქუჩის კუთხეში მისულიყო.
“არ მახსოვს ვინ მაძლევდა ბრძანებას, მე ბევრი უფროსი მყავს და არ მახსოვს ზუსტად რომელმაც მითხრა”, – ამბობს სპეცრაზმელი.
დღეს გაირკვა, რომ წიქორიძე ორგზის დაზარალებულია. მოწმეს ადვოკატების კითხვებზე სპეცრაზმელმა თავდაპირველად უპასუხა, რომ არა, მოგვიანებით, დაცვის მხარის რეპლიკაზე – არ ხართ დაზარალებულად ცნობილი? მოწმემ პასუხი დააზუსტა და თქვა, რომ კი არის სხვა საქმის დაზარალებულიც.
ეხლა მახსენდება რომ კი ვარ დაზარალებული სხვა საქმეზეც… დაზარალებურლად ვცნობ თავს აქაც და სხვა საქმეზეც”- ამბობს წიქორიძე.
სპეცრაზმელი დღეს საათნახევრის განმავლობაში აძლევდა ჩვენებას. წიქროიძემ თქვა, რომ პარლამენტთან მიმდინარე აქციაზე 28 ნოემბერს, დაახლოებით, 23:00 საათზე მივიდა. დაზიანება კი 29 ნომებერს ღამით მიიღო. მისი განცხადებით, მას თვალთან მოხვდა “პიროტექნიკა, რომელიც ფერად ნივთიერებას უშებდა”.
“ვიდექით ჭიჭინაძე რუსთაველის კუთხეში, სადაც იყვნენ საკმაოდ ბევრი რაოდენობით აქციის მონაწილეები, სადაც იყო დიდი აგრესია პოლიციის მიმართ. იყო პიროტექნიკის სროლა, წყლის ბოთლების, რომელიც სავსე იყო ქვიშით, კვერცხებს ისროდნენ ჩვენი მიმართულებით, ქვებსაც აყოლებდნენ, იყო ბუშტები “კრასკებით სავსე”, რომლებიც რომ მოხვედროდა ყველას დააზიანებდა ისეთ საგნები იყო, იყო ფილის ნატეხები. ისეთი ქმედებები, პოლიციის მიმართ უხეშად მოპყრობის ძალადობრივი ქმედებები მიმდინარეობდა ერთი საათის განმავლობაში. ისროდნენ. მე მომხვდა პიროტექნიკა, რომელიც ფერად ნივთიერებას უშვებდა, მომხვდა მარცხენა თვალის არეში და დამიზიანა”. – თქვა მოწმე პოლიციელმა სასამართლოზე.
საქმის ერთ-ერთმა ბრალდებულმა, ზვიად ცეცხლაძემ მოწმეს დააზუსტებინა, რა სახის პიროტექნიკა მოხვდა, მას.
“თქვენ საუბრობდით პიროტექნიკაზე და პიროტექნიკის აღწერაში თქვით, რომ განსხვავებულ ფერს უშვებდა, აქ რატომღაც არასწორად იქნა მიჩნეული, რომ ფეიერვერკზე იყო საუბარი, მაგრამ თქვენი აღწერილობა ჰგავდა იმას, რომ ეს იყო კვამლის გამშვები, ქაღალდის ხელსაწყო, რომელიც უშვებს სხვადასხვა ფერის ბოლს. თუ შეგიძლიათ დააზუსტოთ, რა სახის პიროტექნიკა იყო ეს იყო ფეიერვერკი თუ სწორედ ეს ქაღალდის ნივთიერება, რომელიც უბრალოდ ფერად კვამლს უშვებდა?” – ჰკითხა ცეცხლაძემ.
“არა ფეიერვერკი იყო, რომელმაც დაზიანება მომაყენა, დამწვა”. – უპასუხა მოწმე პოლიციელმა.
დაცვის მხარის შეკითხვაზე, მიიღო თუ არა მან ბრალდებულებიდან რომელიმეს ამოცნობის პროცესში მონაწილეობა, მოწმე პოლიციელმა უარყოფითი პასუხი გასცა, რადგან რთულია იმ პირის ამოცნობა, რომლის მიერ ნასროლი საგნითაც მან დაზიანება მიიღო.
შეკითხვაზე – ვინ გაისროლა პიროტექნიკა მის მიმართულებით? მოწმე პოლიციელმა უპასუხა, რომ არ დაუნახავს.
ბრალდების მხარის შეკითხაზე, ჰქონდათ თუ არა მას ან მის კოლეგებს, რამე თავდაცვის საშუალება, გივი წიქორიძემ უპასუხა – “არანაირი, არაფერი”.
ადვოკატმა შოთა თუთბერიძემ მოწმეს ჰკითხა, შეუძლია თუ არა გამიჯნოს, ან იცის თუ არა, ის ადამიანი, რომელსაც ფეიერვერკი ეჭირა, რომელიც მას მოხვდა, იყო დემონსტრანტი, თუ პირობითად სუს-ის მიერ გაგზავნილი აგენტი? – რაზეც პოლიციელმა უპასუხა, რომ არ იცის.
ადვოკატმა გუჯა ავსაჯანიშვილმა მოწმეს ჰკითხა: – თქვენ აქ ხომ ვერ ხედავთ იმ ადამიანს, რომელმაც დაზიანება მოგაყენათ? – მოწმემ თქვა, ვერა ვერ ვხედავ.
ავსაჯანიშვილი: – შეგიძლიათ კონკრეტული ადამიანების სახელი და გვარი თქვათ, რომელიც დაადასტურებს, რომ თქვენ დაზიანება მიიღეთ, ვინც გვერდით გედგათ?
მოწმე: – კონკრეტული ვერა, არ მახსოვს. (tvpirveli)
კომენტარები