20-წლიანი პაუზის შემდეგ, უმაღლეს სასწავლებლებში ქართული ენის სავალდებულო სწავლება ბრუნდება. საკანონმდებლო ორგანომ საკითხის განხილვა ენათმეცნიერების – გიორგი გოგოლაშვილისა და ნანა მაჭავარიანის მიმართვის შემდეგ დაიწყო. ინიციატივას განათლების, მეცნიერებისა და ახალგაზრდულ საქმეთა კომიტეტის მხარდაჭერა უკვე აქვს.
ქართული ენის სწავლება უნივერსიტეტებში 2005 წელს შეწყდა; საერთოდ გაუქმდა “ქართული ენა”, როგორც საუნივერსიტეტო საგანი. მმართველი გუნდი წინა ხელისუფლების ამ გადაწყვეტილებას ქართულ ენაზე მიზანმიმართული შეტევად ხსნის. მათივე განმარტებით, ქართული ენის სწავლება უნივერსიტეტებში სექტემბრიდან აღდგება.
“14 აპრილს განვიხილეთ საკანონმდებლო წინადადება, რომელსაც მხარი დავუჭირეთ, რომ 2025 წლის 1 სექტემბრიდან სავალდებულო გახდეს უმაღლეს სასწავლებლებში პირველ საფეხურზე, ბაკალავრიატში ქართული ენის სწავლება. რა ფორმით მოხდება ეს ყველაფერი, ამას, რა თქმა უნდა, ხარისხის ცენტრი უნივერსიტეტებთან ერთად გადაწყვეტს”, – აცხადებს განათლების, მეცნიერებისა და ახალგაზრდულ საქმეთა კომიტეტის წევრი ლადო ბოჟაძე.
კომენტარები