ვახო გომელაური ისრაელის კიბერუსაფრთხოების კომპანია Cellebrite-ისგან 6,796,092 ლარის ღირებულების მოწყობილობებისა და პროგრამულ უზრუნველყოფას ყიდულობს, რომლებიც მობილურ ტელეფონებში, კომპიუტერებსა და სხვა ციფრულ აპარატურაში დაცული ინფორმაციის წაკითხვის შესაძლებლობას იძლევა.
ქვეყანაში დაწყებული რეპრესიების ფონზე გაჩნდა ვარაუდი, რომ უსაფრთხოებისთვის განკუთვნილ პროგრამას რეჟიმი საკუთარ მოქალაქეებზე შურისძიებისთვის გამოიყენებს.
ექსპერტები ბელორუსის, რუსეთსა და სერბეთის მაგალითს იხსენებენ, სადაც დიქტატორულმა რეჟიმებმა კრიმინალისტიკური პროგრამა ოპონენტების დევნისთვის გამოიყენეს.
“სახელმწიფო საკუთარი ტექნიკური შესაძლებლობების დისკრედიტაციას აკეთებს, როგორც ეროვნულ, ასევე საერთაშორისო დონეზე და ფაქტობრივად უსაფრთხოების სექტორის ოპერატიულ-ტექნიკურ რესურსებს პარტიის ინტერესებისთვის იყენებს. მანიფესტაციებზე ნაცემ-ნაწამებ ხალხს ხშირად ტელეფონებსაც ართმევდნენ, ამ ტელეფონთაგან ზოგიერთი ლომბარდებში ხდებოდა, ზოგიერთი კი შინაგან საქმეთა სამინისტროს კრიმინალისტურ დეპარტამენტში. ეს დეპარტამენტი არის ერთ-ერთი, რომელსაც მსგავსი პროგრამული უზრუნველყოფები გააჩნია. იკვეთებოდა მსგავსი ნიშნები, რომ ეს ტელეფონები, ჩამორთმეული ან წართმეული საშუალებები, რაღაც დანაშაულთან კავშირში კი არ იყო ამოღებული, არამედ თევზაობდნენ, იქნებ რამე ეპოვათ. საბოლოოდ, არ გაგვიკვირდება, რომ პარტნიორმა ქვეყნებმა, რომლებიც სახელმწიფოს აძლევდნენ, ეს გზები დაიკეტოს”- ამბობს “პირველებთან” გიორგი დავითური, “ინფორმაციის თავისუფლების განვითარების ინსტიტუტი”.
ქართულ რეალობაში მოსალოდნელ საფრთხეებზე საუბრობს ანდრო გოცირიძეც:
“პროგრამა არის აპრობირებული, იყენებენ საგამოძიებო მოქმედებებისთვის, ის ტელეფონებზე წვდომას უზრუნველყოფს, საუბარია ძირითადად ჩამორთმეულ ტელეფონებზე, მის სწრაფად გახსნას და იქ საგამოძიებო მასალების მოძიებას უზრუნველყოფს. თავისთავად , ამ პროგრამას ძალიან ბევრი სახელმწიფო იყენებს, ისრაელის კომპანია, მაგრამ აქ მნიშვნელოვანია, რამდენად გადის პოლიცია ლეგიტიმურობის ჩარჩოდან – ჩვენ როდესაც ვხედავთ, რომ ჩვენთან ყოველგვარი პროცესუალური ნორმების დარღვევით ტარდება, (იქნება ეს ტელეფონის ჩამორთმევა, თუ დასაკითხად გადაყვანა, ან გამოკითხვა) ვეღარ გაიგებ, საგამოძიებო მოქმედება ტარდება თუ რაღაც დაშინების ღონისძიება, გასაგებია, რომ ეს შესყიდვა რისკების შემცველია, თუმცა ჩვენ მაინც უნდა გვესმოდეს, რომ ეს არ არის “პეგასუსის” ტიპის პროგრამა”- ამბობს უსაფრთხოების ექსპერტი ანდრო გოცირიძე.
კომენტარები