რამდენიმე საათში გაეცნო და ხელიც მოაწერა – რეპრესიული კანონები

“ოცნების” პარლამენტის მიღებულ რეპრესიულ კანონპროექტებს ოლიგარქის პრეზიდენტმა მიხეილ ყაველაშვილმა ხელი მოაწერა. საუბარია 10-მდე კანონზე, რომელიც “ოცნებამ” 2 დღეში სამი მოსმენით მიიღო.

აღსანიშნავია, რომ კენჭის ყრის დასრულების შემდეგ, რომელიც გუშინ საღამოს დაახლოებით 19:00 საათზე დასრულდა, მიხეილ ყაველაშვილს კანონპროექტების გასაცნობად და ხელის მოსაწერად სულ რამდენიმე საათი დასჭირდა.

შეგახსენებთ, რომ ერთპარტიულმა პარლამენტმა ადმინისტრაციულ და სისხლის სამართლის კოდექსებსა და შეკრება-მანიფესტაციების შესახებ კანონში რეპრესიული ცვლილებები სამი მოსმენით მიიღო.

“ოცნებამ” მეორე მოსმენის დროს კანონპროექტში შესწორებები შეიტანა და ისეთ სამართალდარღვევებზე, რომელიც ადრე მხოლოდ ჯარიმას ითვალისწინებდა პატიმრობაც დაუმატა.

შესწორებები შეკრება-მანიფესტაციების კანონის მე-9, მე-11 და მე-11 პრიმა მუხლის დარღვევისთვის გათვალისწინებულ პასუხისმგებლობებს  შეეხო.

ადმინისტრაციული სამართალდარღვევისთვის, რომელიც გულისხმობს ადმინისტრაციული შენობების, გზების და მაგისტრალების ბლოკირებას ან შეკრებებზე ძალადობისკენ მოწოდებას, აკრძალული ნივთების ქონას, გზის გადაკეტვას, პირველ ვერსიაში გათვალისწინებული იყო 5000-ლარიანი ჯარიმა საგნის კონფისკაციით, ორგანიზატორის შემთხვევაში – 15 000 ლარის ჯარიმა. ახალი ცვლილებით, ჯარიმა იქნება 5000 ლარი ან ადმინისტრაციულ პატიმრობა 15 დღემდე ვადით, ორგანიზატორის შემთხვევაში კი – 15 000 ლარი ჯარიმა და 20 დღემდე პატიმრობა. ქმედების განმეორებითი ჩადენა გამოიწვევს ადმინისტრაციულ პატიმრობას 25 დღემდე, ნაცვლად კანონპროექტის პირველ ვერსიაში შემოთავაზებული 20 დღისა.ორგანიზატორის შემთხვევაში განისაზღვრა 60-დღიანი პატიმრობა.

აქციაზე სახის დაფარვის და ლაზერის ტარების აკრძალვის დარღვევა, თავდაპირველად, პატიმრობას არ ითვალისწინებდა, ცვლილებით კი გამოიწვევს დაჯარიმებას 2000 ლარით ან 7 დღემდე ადმინისტრაციულ პატიმრობას.