“ბასილაშვილი შეუდარებელი სპორცმენია… სპორტცმენია… სპორტსმენია!” – დეპუტატის სამი მცდელობა

ნიკა ბასილაშვილის ირგვლივ ატეხილმა სკანდალმა, დაგვანახა რამდენმა იცის, როგორ იწერება სწორად სიტყვა – სპორტსმენი.

სოციალურ ქსელში ვრცელდება “ქართული ოცნების” დეპუტატის, ნინო წილოსანის პოსტის სქრინები, სადაც ის ბასილაშვილს ერთ პოსტში ორჯერ ეძახის სპორცმენს…

“ალიამ” გადაამოწმა წილოსანის გვერდი, მას მართლაც უდევს ბასილაშვილზე პოსტი, რომელიც 4 ჯერ აქვს რედაქტირებული.

პირველ ვარიანტში ორჯერ წერია სპორცმენი…

მეორე ვარიანტში – ერთგან “ჩასწორებული” აქვს და უწერია სპორტცმენი და იგივე პოსტის ბოლოს ისევ სპორცმენი წერია.

პოსტი გუშინაა დაწერილი და იგი ბოლოს ერთი საათის წინ დააკორექტირა დეპუტატმა.

პოსტი ახლა ასე გამოიყურება:

“ნიკოლოზ ბასილაშვილის სასამართლის გადაწყვეტილებამდე ვფიქრობ ყველაზე სწორი იქნება შევწყვიტოთ თემაზე დისკუსია

რატომ? ერთის მხრივ, ქალის მიმართ ძალადობის ძალიან მგრძობიარე თემაში სავარაუდო მოძალადის მიმართ ჩვენი სიმპატიები გარკვეულწილად სუბიექტურებს გვხდის და ამ განწყობით ნებისმიერი არასწორი განცხადება სტერეოტიპებს, განწყობებს და საზოგადოებაში გავრცელებულ დამახინჯებულ წარმოდგენებს კიდევ უფრო აძლიერებს. მეორეს მხრივ, კი სასწორზე ჩვენი ქვეყნის წარმატებული და ყველასათვის საამაყო სპორტსმენის რეპუტაციაა.

როცა ყველაფერი გაირკვევა? ზუსტად გვეცოდინება ამ კონკრეტულ შემთხვევაში სად უნდა ვიდგეთ.

იქამდე? გვახსოვდეს რომ ქალთა მიმართ ძალადობა მიუღებელია, თითოეული შესაძლო ძალადობის ფაქტის რომანტიზირება კი პოტენციურ მოძალადისთვის წამახალისებელი! ნიკოლოზ ბასილაშვილი შეუდარებელი სპორტსმენია!
და ბოლოს, ეს ორი ფაქტი ერთმანეთს არ გამორიცხავს.”

გაგვახსენდა, წილოსანის გასული წლის პოსტი, სადაც ის წერდა, როგორ თანაშემწეს ეძებდა:

“ფუნქციები:

• პარლამენტის წევრის ყოველდღიური საქმიანობის კოორდინაცია, ინფორმაციის მიწოდება დაგეგმილი შეხვედრების შესახებ;
• საქმიანი შეხვედრების ორგანიზება;
• მივლინებების ორგანიზება;
• საქმიანი მიმოწერის უზრუნველყოფა;
• დოკუმენტების თარგმნა;
• კანონპროექტების მომზადებაში მონაწილეობა;
• საქმისწარმოების სპეციალურ პროგრამაში შემოსული დოკუმენტების გაცნობა, დამუშავება, პასუხების მომზადება და გაგზავნა;
• შემოსული განცხადებების (წერილობითი, ზეპირი, სოციალური ქსელების და ელ.ფოსტის) აღრიცხვა, იდენტიფიცირება და შესაბამის ფორმატში რეაგირება;
• იდენტიფიცირებული პრობლემების მოსაგვარებლად და, პარლამენტის წევრის სამუშაო პროცესიდან გამომდინარე, სხვა საკითხებთან დაკავშირებით შესაბამის უწყებებთან კომუნიკაცია;
• მოქალაქეთა ადვოკატირება;
• მოსახლეობასთან შეხვედრებში / მაჟორიტარის ინიციატივით მოწყობილ შეხვედრებში აქტიური ჩართულობა და საკითხების/იდეების ინიცირება;
• მაჟორიტარი დეპუტატის პროექტებში აქტიური ჩართულობა;
• მაჟორიტარის ბიუროსთან კოორდინაცია;
• პარლამენტის წევრის ოფიციალური Facebook-გვერდის ადმინისტრირება.

➡ ცოდნა, კვალიფიკაცია, უნარები:
• უმაღლესი განათლება;
• სასურველია საჯარო სამსახურში მუშაობის გამოცდილება;
• ორგანიზატორული უნარები;
• ქართული ენის სრულყოფილად ცოდნა (წერითი და ვერბალური კომუნიკაციის უნარები);
• ინგლისური ენის B2 დონეზე ცოდნა;
• საოფისე პროგრამების (Ms. Word , Ms Excel) მაღალ დონეზე ცოდნა.”

მაშინ, ბევრმა თქვა, რომ წილოსანი მონას ეძებს…

როგორც ჩანს, მონა არაფერ შუაშია, მართლა სჭირდება ასეთი თანაშემწე…