შპს საქნახშირმა ასზე მეტი ადამიანი სამსახურის გარეშე წინასაახალწლოდ დატოვა – როგორც ყოფილი მეშახტეები “პირველებთან” ინტერვიუში ყვებიან, ზემდგომები სოციალურ ქსელში ევროკავშირის მხარდამჭერი სტატუსების გამოქვეყნების უფლებას არ აძლევდნენ.
გიორგი აბულაძე აცხადებს, რომ მას კონკრეტული პირები მიუგზავნეს, რომლებიც ემუქრებოდნენ, რომ იმ შემთხვევაში, თუ სოციალური ქსელიდან “ქართული ოცნების” მიმართ კრიტიკულ განცხადებებს არ აიღებდა, მაშინ სამსახურიდან გაათავისუფლებდნენ.
“აგიტაციისთვის ბეჟან წაქაძე იყო მოსული და მერი ჩერქეზიშვილი, რომლებმაც განაცხადეს, რომ არ გვინდა კომპანიაში ისეთი პიროვნებები, რომლებიც მთავრობას ლანძღავენო” – ამბობს ყოფილი მეშახტე.
მოხდა თავიდან ჩემი გაფრთხილება, ნუ აზიარებ სოციალურ ქსელში ისეთ პოსტებს, რომელიც მთავრობის საწინააღმდეგო არისო. მომიგზავნეს პიროვნებები და დამემუქრნენ, რომ დავკარგავდი სამუშაოს მეც, ჩემი ძმაც, ჩემი რძალიც. მოხდებოდა ამის ნიადაგზე შურისძიება. საარჩევნო აგიტაციისთვის ბეჟან წაქაძე იყო მოსული და მერი ჩერქეზიშვილი, რომლებმაც განაცხადეს, რომ არ გვინდა კომპანიაში ისეთი პიროვნებები, რომლებიც მთავრობას ლანძღავენო”, – ამბობს გიორგი აბულაძე.
ყოფილი მეშახტე ხვიჩა გაბუნია რეპრესიების მომწყობი პიროვნების სახელს და გვარს ასახელებს და ამბობს, რომ გია ბაბუხადია არის “ოცნების” საკრებულოში სწორედ ის დეპუტატი, რომლებიც მეშახტეებზე მუქარას ახორციელებს.
ხვიჩა გაბუნიას ცნობით, ტყიბულის შახტის გენერალური დირექტორი რუსი მიხაელ სუსკია, რომელიც უკრაინაში რუსეთის ომს ამართლებს.
გია ბაბუხადია, მეტსახელად ბრუცა არის “ქართული ოცნების” დეპუტატი საკრებულოში, რომელიც ხალხზე რეპრესიებს ახდენს. ავედი გენერალურ დირექტორთან, მიხაელ სუსკისთან. შევეკითხე, რატომ მათავისუფლებთ შახტიდან-მეთქი. მან გამცა პასუხი, რომ ხვიჩა წადი შენ სახლში, ოთხი თვე დაისვენე, ეს ადამიანი არის რუსი, რომელიც ამართლებს რუსეთის ომს უკრაინაში. ტყიბულის შახტის ხელმძღვანელობაში ჩართული არის რუსი მიხაელ სუსკი”, – ამბობს ხვიჩა გაბუნია.
“პირველები” პოლიტიკური ნიშნით გათავსიუფლებაში მხილებულ გია ბაბუხადიას ესაუბრა. საკრებულოში “ქართული ოცნების” დეპუტატი ამტკიცებდა, რომ პოლიტიკური ნიშნით არავინ არ გაუთავისუფლებიათ.
არავის არავინ პოლიტიკური ნიშნით არ გაუთავისუფლებია. მომისმინე ჩემო კარგო, ახლა არის ასეთი მოდა საქართველოში, თუ ვინმემ რამე დაშავა, უსაფრთხოების წესები დაარღვია, გამოუშვეს სამსახურიდან, ყველა ხდება ოპოზიციონერი და პოლიტიკური ნიშნით გამათავისუფლესო. კარგად ბრძანდებოდეთ.. ჩვენი გენერალური დირექტორი რუსი არ არის, ქართველია”, – ამბობს სატელეფონო საუბრის დროს ბაბუხადია.
წყარო – ტვ პირველი
კომენტარები