ბენგალის ყურეში სუპერ ციკლონის მოახლოვების ფონზე, ინდოეთსა და ბანგლადეშში მილიონობით ადამიანის ევაკუაცია მიმდინარეობს სანაპირო ზონებიდან. გავრცელებული ინფორმაციით, ციკლონი ამფანი ორი ქვეყნის სანაპირო რეგიონებში ოთხშაბათს დაატყდება თავს.
ინდოეთის მთავრობის განცხადებით, უკვე 20-ზე მეტი სამაშველო ჯგუფი არის მზად სასწრაფო დახმარების აღმოსაჩენად, კიდევ რამდენიმე კი რეზერვშია.
კორონავირუსის დაავადების გავრცელების გამო ძალზე რთულდება ადამიანების ევაკუირება აღნიშნული რეგიონებიდან, რადგან მოსახლეობის სანაპირო ზონების გარიდებასთან ერთად მთავრობამ მათ შორის დისტანციის დაცვაზეც უნდა იფიქროს, რათა ინფექციის გავრცელებას არ შეუწყონ ხელი.
ვარაუდობენ, რომ ციკლონი ამფანი 185 კმ/სთ სიჩქარით დაატყდება თავს სანაპიროებს. მთავრობის მაღალჩინოსნები აცხადებენ, რომ ევაკუირება გაგრძელდება ოთხშაბათს დილამდე. ბანგლადეშის კატასტროფის მენეჯმენტის უწყებაში აცხადებენ, რომ იგეგმება 2 მილიონამდე ადამიანის უსაფრთხო გაყვანა რეგიონებიდან.
შეგახსენებთ, რომ აღნიშნული სუპერ ციკლონი ბენგალის ყურეში პირველად აღინიშნება 1999 წლის შემდეგ. 21 წლის წინ ორისას სანაპიროებდან განვითარებულმა შტორმმა 9000-ზე მეტი ადამიანი იმსხვერპლა.
კომენტარები