წინასაარჩევნო კამპანიის ფარგლებში, კოალიცია “ძლიერი საქართველოს” ლიდერები ამომრჩევლებს ხვდებიან – მამუკა ხაზარაძე, ლევან ცუცქირიძე, ალეკო ელისაშვილი და საბა ბუაძე მოქალაქეებს კოალიციის გეგმას აცნობენ, თუ როგორ აპირებენ 2024 წლის საპარლამენტო არჩევნების შემდეგ, ქვეყნის განვითარებას.
როგორც კოალიციის ერთ-ერთი ლიდერი, მამუკა ხაზარაძე აცხადებს, “ძლიერი საქართველოს” გეგმა არის 200 ათასი სამუშაო ადგილის შექმნა, პენსიების გაზრდა, კურსდამთავრებულებისთვის გარანტირებული სამუშაო ადგილების შექმნა, რუსული ოკუპაციის და რუსული ზეგავლენის შემცირება და იმ 9 პუნქტის შესრულება, რომლითაც საქართველო ევროკავშირის წევრი გახდება.
“თქვენ იცით, რომ 12 წელი და მანამდე 9 წელი, 20 წელი ამ ქვეყანას მმართავდა ორი პოლიტიკური ძალა და დროა, რომ რეალურად ჩვენი ქვეყანა მართოს, იმ ახალგაზრდა პროფესიონალმა ძალებმა, რომლებსაც არ აქვთ ისეთი გამოცდილება, პოლიტიკური სიმძიმე არ აქვთ წარსულის. ამ ქვეყანას სჭირდება რეალური ალტერნატივა, სწორედ რეალური ალტერნატივის გუნდს წარმოგიდგენთ დღეს ჩვენ. თქვენ გახსოვთ ალბათ ის დაპირებები, რომლებიც ყველამ მოვისმინეთ 100 ქარხანა, უფასო ფული თან გრძელვადიანი. 5-5 მილიონიანი ინვესტიცია სოფლებში, მარიხუანას პლანტაციების გაშენება. ეს მე მგონი ყველას დაავიწყდა. ეს არის ფენომენალური ამბავი, როცა საქართველოში ტრადიციებზე გვესაუბრებიან, ღირსებაზე გვესაუბრებიან, ღვინის სამშობლოზე გვესაუბრებიან და ამ დროს მთელი ”ქართული ოცნება” ცდილობდა, რომ მარიხუანას მწარმოებელი ქვეყანა გავმხდარიყავით”, – განაცხადა მამუკა ხაზარაძემ.
რა გეგმა აქვს კოალიცია “ძლიერ საქართველოს” ონკოპაციენტებისთვის განკუთვნილი მკურნალობის ხარისხის გასაუმჯობესებლად? – შეხვედრაზე ეს კითხვაც იქნა დასმული:
“ჯანდაცვის სისტემა მთლიანად შესაცვლელია, მილიონობით დოლარი გადის ქვეყნიდან. პირველი მიმართულება არის თურქეთი, პაციენტს მიჰყვება გამყოლი, სჭირდება თვითმფრინავის ბილეთი, იქ თარჯიმანი… ასეულობით მილიონებზე ვსაუბრობთ. ის, რაც ”ქართულმა ოცნებამ” გააკეთა საყოველთაო ჯანდაცვა, სწორი შესვლა იყო, მაგრამ ის, რაც ახლა ხდება, ამას ვერანაირი ბიუჯეტი ვერ გაუძლებს თუ ჯანდაცვა არ გადავიყვანეთ დაზღვევის სისტემაზე, რომელიც მისცემს ყველას, მათ შორის, კერძო დაზღვევას და სახელმწიფო დაზღვევას, რომელიც მისცემს ყველას გარანტიას, რომ წამლის და მკურნალობის გარეშე არ დარჩება და არ იქნება ის ჩაწყობები, ვისაც ჰყავს ნაცნობი ჯანდაცვის სამინისტროში და რომელ კლინიკას დააფინანსებენ და ა.შ.
ამოცანა უნდა იყოს, პირველ რიგში, დაავადების პრევენცია, პირველადი ჯანდაცვა უნდა მოწესრიგდეს სანამ განვითარება და სტადიებზე გადავა უბედური დაავადება, მანამდე უნდა იცოდეს მთელმა სისტემამ, სად გააკეთოს პრევენცია. ეს ჯდება ძვირი, ეს მთავრდება ცუდად. ძალიან სერიოზული პროგრამა გვაქვს ამასთან დაკავშირებით”, – განაცხადა მამუკა ხაზარაძემ.
კომენტარები