ბრალდებული ბლოგერი უჩა აბაშიძე მისი მეუღლისგან, ბრალდებულ მარიამ იაშვილისგან განსხვავებით, ამ დრომდე დუმილის უფლებით სარგებლობს და მას პოზიცია არ შეუცვლია.
დღევანდელ სხდომაზე, რომელიც თბილისის საქალაქო სასამართლოში გაიმართა, ბრალდების მხარის 3 მოწმე, ჰაბიდოსკოპიური ექსპერტები და ასევე, ერთ-ერთი დაზარალებული, უცხო ქვეყნის მოქალაქე დაიკითხა.
საქმის პროკურორის, ანი ხახანაშვილის განმარტებით, ბრალდების მხარის მოწმეებმა საქმისათვის მნიშვნელოვანი ფაქტობრივი გარემოებები დაადასტურეს. თუმცა, ვინაიდან სხდომა დახურულ რეჟიმში ტარდება, დეტალები უცნობია.
უჩა აბაშიძის ადვოკატის, შოთა თუთბერიძის განმარტებით, მოწმეთა დაკითხვის პროცესში მნიშვნელოვანი ხარვეზები გამოვლინდა. მისივე თქმით, მოწმეთა ჩვენებაში არათანმიმდევრულობა გამოიკვეთა, მათ შორის, მოწმეები ჩვენებებში ვერ ხსნიდნენ იმ გარემოებებს, რაც გამოძიების ეტაპზე ჰქონდათ დადასტურებული.
ცნობისთვის, უჩა აბაშიძესა და მარიამ იაშვილს ბრალი საქართველოს სისხლის სამართლის კოდექსის 157-ე პრიმა და 236-ე მუხლებით წარუდგინეს, რაც პირადი ცხოვრების საიდუმლოს უკანონოდ მოპოვება – შენახვას და ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვას გულისხმობს.
როგორც ირკვევა, შინაგან საქმეთა სამინისტროს ცენტრალური კრიმინალური პოლიციის დეპარტამენტში გამოძიება მიმდინარე წლის 4 მაისს, სულ სხვა საქმეზე დაიწყო. კერძოდ კი, სხვადასხვა სახელმწიფო უწყებების, შინაგან საქმეთა სამინისტროს, იუსტიციის სამინისტროსა და საქართველოს პარლამენტის ვებგვერდებზე განხორციელებული კიბერშეტევის ფაქტებზე. სამართალდამცველებმა უჩა აბაშიძისა და მისი მეუღლის, მარიამ იაშვილის საცხოვრებელ ბინებში ჩხრეკა ჩაატარეს. გამოძიება ამტკიცებს, რომ ბრალდებულებმა საცხოვრებელ ბინაში სხვადასხვა ვიდეო-აუდიო მოწყობილობები ფარულად დაამონტაჟეს, რომელთა საშუალებითაც მარიამ იაშვილსა და სხვადასხვა პირებს შორის განხორციელებულ ინტიმურ კავშირს უკანონოდ იღებდნენ.
ამასთან, სახელმწიფო ბრალდების ცნობით, დაკავებულებმა უკანონოდ მოიპოვეს და მათ კუთვნილ კომპიუტერულ სისტემაში ასეულობით პირის პირადი ცხოვრების საიდუმლოს შემცველი ინფორმაცია შეინახეს.
გამოძიების მტკიცებით, ჩანაწერებში საზოგადოებისათვის ცნობილი პირებიც ფიგურირებენ, თუმცა, პირადი ცხოვრების შემცველი ინფორმაციის მოპოვება და შენახვა, თუ მართლაც ამ ფაქტს ჰქონდა ადგილი, ერთნაირად დანაშაულია ცნობილი, თუ არაცნობილი პირების შემთხვევაში. გამოძიება არ აკონკრეტებს, მაშინ, როცა სხდომა დახურულ რეჟიმში მიმდინარეობს, რა საჭიროებას წარმოადგენდა ამ უკანასკნელი ინფორმაციის გახმოვანება. ცნობისთვის, სწორედ ეს ფრაზა გახდა მიზეზი, არაერთი ადამიანის მიმართ ჭორის, ღირსების შემლახველი ინფორმაციების გავრცელების სოციალურ ქსელში, თუმცა, გამოძიება, ამ ეტაპზე, ამ ფაქტებით არ დაინტერესებულა.
კომენტარები