“რუსები ცდილობენ დანაყოფების მოშველიებას აფრიკიდანაც კი, სადაც 10 წელია სამხედრო ქსელს ქმნიდნენ” – გიორგი კობერიძე

პირველ რიგში დავიწყოთ რუკის ანალიზით:

კურსკის ოლქში, სუჯას ჩრდილო-დასავლეთით უკრაინული შეტევა მდინარე სეიმის მიმართულებით ვითარდება. აქტიურად იბომბება მდინარეზე გადასასვლელი სამივე ხიდი. განსაკუთრებულად აქტიური დარტყმები ხდება გლუშკოვოს ხიდზე, რომელსაც HIMARS-ით ბომბავენ. თუკი ხიდები ჩაირღვა და უკრაინელებმა მდინარეს მიაღწიეს, რუსები ოპერატიულ ალყაში მოხვდებიან და დანებება ან მანამ ევაკუაცია მოუწევთ, სანამ გასავლელი ჩაიკეტება. უკრაინული პოზიციებიდან მდინარემდე დარჩენილია 6 კილომეტრი. აღსანიშნავია ისიც, რომ მდინარიდან საზღვრამდე ტერიტორიის ეფექტურ კონტროლს რუსები ვერ ახერხებენ და უფრო ისეთი პოზიციებისათვის მართავენ აქტიურ ბრძოლას როგორიც ტეტკინო და სნაგოსტია.

– სუჯას ჩრდილო-დასავლეთით უკრაინელებმა სასაზღვრო დასახლება გორდევკა დაიკავეს და კიდევ უფრო გააფართოვეს პლაცდარმი. ხოლო სუჯას აღმოსავლეთით უკრაინელებმა დასახლება ჩერკასკოე პოროჩნიე აიღეს. უკრაინული დღევანდელი წინსვლა კურსკის ოლქში დაახლოებით 2 კილომეტრი იყო.

– რუსეთის ბელგოროდის ოლქის ჩრდილოეთ სასაზღვრო რაიონებში რუსების მდგომარეობა დამძიმდა. უკრაინელებმა გაარღვიეს რუსული წინააღმდეგობა არამხოლოდ კოლიტილოვკასთან, არამედ ვიაზოვოეშიც შევიდნენ. რუსი სამხედრო პროპაგანდისტები შიშობენ რომ კურსკის ოლქზე კრემლის ფოკუსმა შეიძლება ბელგოროდში მათი მდგომარეობა ბევრად გაართულოს. ეს კი უბრალო ამბავი არ არის, რადგან სწორედ ბელგოროდის ოლქია რუსული ლოჯისტიკის ერთ-ერთი მთავარი კვანძი. განსაკუთრებით კი ხარკივის ოლქისაკენ გადასროლილი რუსული ნაწილებისათვის.

– როგორც კურსკის, ისე ბელგოროდის ოლქებიდან დიდია რუსი ტყვეების რაოდენობა. მათი საერთო რიცხვი უცნობია, მაგრამ საუბარია ასეულობით (1000+) ტყვეზე. მათი უმრავლესობა წვევამდელია. რუსეთისათვის კი ეს დიდი დარტყმაა. 2022 წლიდან ასობით უკრაინელი სამხედრო და მშობელმოკლული ბავშვი იმყოფება რუსეთი ტყვეობაში (ოკუპირებული ტერიტორიებიდან ბავშვები გადაასახლეს და უკანონოდ გააშვილეს). ამ რაოდენობის რუსი ტყვეების ხელში ჩაგდების ფონზე მათი მასობრივი გაცვლა უკრაინისათვის კრიტიკულად მნიშვნელოვანია.

– არის სამხედრო ტექნიკის ალაფიც. უკრაინელებს ხელში ჩაუვარდათ როგორც T80 ისე T90 ტანკები. მათ ხელში აღმოჩნდა რამდენიმე ქვეითთა საბრძოლო მანქანა და რადიო-კომუნიკაციის აპარატები.

– რუსები ცდილობენ დანაყოფების მოშველიებას არამხოლოდ კალინინგრადიდან და დონეცკიდან არამედ აფრიკიდანაც კი, სადაც დაახლოებით 10 წელია რუსები საკუთარ სამხედრო ქსელს ქმნიდნენ და სხვადასხვა სამხედრო ორგანიზაციის სახელით ასობით ჯარისკაცს გზავნიდნენ. მათ შორის მოწინავე იყო “ვაგნერის” დანაყოფი. ახლა რუსებს ძალიან სჭირდებათ პროფესიონალი ცოცხალი ძალა. ამიტომაც ხდება ყველა მხრიდან რუსების მაქსიმალური გადაყვანა.

– კრემლს ეშინია, რომ თუკი დონეცკისა და ლუგანსკის ოლქებიდან ის თავის შემტევი ნაწილების მასობრივ ევაკუაციას დაიწყებს უკრაინელები იქ სწრაფ კონტრშეტევაზე გადავლენ და დაიბრუნებენ დაკარგულ მიწებს. სწორედ ამიტომ, რუსები ცდილობენ, რომ დონეცკის ოლქში შეტევის ტემპი კვლავ დაუბრუნდეს მაღალ ნიშნულს. ამისათვის იგივე ბოლო 48 საათია, რუსული დანაყოფები ცოცხალი ძალის ტალღოვან შეტევებზეც კი არიან გადასული დონეცკის მიმართულებაზე. მათი მიზანი ტორეცკესა, ნიუ-იორკის აღება და პოკროვსკამდე მიღწევაა.